Nunarput Kinami takornariaqarfittut nittarsaakkaat

Kalaallit mamarsaakkanik nerisassiortaasiat, takornariaqarneq, silaannakkut angallanneq, puisit amiinit kavaajaliat, sermersuup ernganik vodkaliaq, Danmarkip aallartitaqarfiani Nunarput pillugu ippassigami nittarsaassisoqarmat, Kiinamiunut takornarialerisunut paasissutissiissutigineqartut tamakkuupput.
Allattoq Elisa Isaksen
novembarip 08-at 2012 06:14

Aatsitassanut Inuussutissarsiornermullu Naalakkersuisup Ove Karl Berthelsenip Nunarput misigisassarsiorfissatut takornariarfissatullu nittarsaappaa.

- Kalaallit suliffeqarfiisa ilaasa pisortaqarfiisalu ilaasa Kiinami Nunatta mineraleqarfittut aatsitassarsiorfittullu nittarsaanneqarnerata saniatigut Ove Karl Berthelsenip atorfilittaasalu Nunatsinnik takornariarfittut nittarsaassinerat nuannaarutigeqaarput, Nunatsinni Takornariaqarnermut Siunnersuisoqatigiinni siunnersortaaneq Malik Milfeldt oqarpoq.

Takornariartitseqatigiiffiup Visit Greenlandip Kiina annerusumik ussassaariffiginanngilaa, Kiinamili pisoorsuit amerliartuinnarput, taakkulu nunaqqatimik tikissimanngisaanut angalarusuttarput.

- Takornariaqarnikkut Kiinamiut soqutiginnilissanersut piffissap ingerlanerani paasinarsissaaq, qularutissaanngitsumilli periarfissaqarluarpoq, Kiinamiummi takornariat angalarusuttut pissarissaartullu immaqa utaqqiinnarput, Malik Milfeldt naggasiivoq.    

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq