Nunarput Issittumi Siunnersuisooqatigiinni issiavissaqartinneqalersoq
Issittumi Siunnersuisooqatigiinni ministerit ataatsimiinnissaannut canadamiut aqagu tikilluaqqusippata 2013-imi ataatsimiinnermut naleqqiullugu allaanerulluinnassaaq.
Ataatsimiinnermi kingullermi Kalaallit Nunaat isumaqatigiinniarnerni aaqqissuisuinit Sverigemiunit issiaviit sallersaannik tunineqanngilaq, taamanikkullu Naalakkersuisunut siulittaasuusoq, Aleqa Hammond, kamaammerluni namminersuussilluni ataatsimiinneq peqataaffigiumajunnaarpaa.
Naalagaaffeqatigiit issiviannik pingasunik tunineqarput
Tamannali tamatumuuna pisariaqassanngilaq. Canadamiut aaqqissuisuusut allatut pissuseqarput Martin Lidegaardillu Savalimmiormiut lagmandiat Kaj Leo Johannesen nunanullu allanut naalakkersuisoq Vittus Qujaukitsoq sanilerissavai.
Naalagaaffeqatigiit aamma oqaaseqarsinnaatitaanertik agguataarniarpaat, Lidegaard, Johannesen Qujaukitsorlu tamarmik oqaaseqarnissaminnut periarfissaqarniassammata, Nunanut allanut allaffeqarfik taama ilisimatitsivoq.
Kalaallit Nunaat annertuumik peqataatinneqassaaq
Kalaallit Nunaat Issittumi Siunnersuisooqatigiinni ukiormanna peqataanissamini aatsaat taama peqataatinneqartigissaaq. Pisortatigoortumik ataatsimiinnerup ammasumillu ataatsimiinnerup saniatigut, Vittus Qujaukitsoq ministerit ullaap tungaani persuarsioratik ataatsimiinneranni aamma peqataassaaq. Kalaallit Nunaatalu tassani peqataatinneqarnera nutaajuvoq. Issittumi Siunnersuisooqatigiinnut ilaasortat tamarmik immikkut ministerimik atorfilittamillu peqataatitaqassapput Naalagaaffeqatigiillu ministerinik pingasunik peqataatitaqassallutik.
Aamma atuaruk Kerry Nunatsinnut tikeraalerpoq
Ullormi ataatsimiinnerit kingullersaat nunanit ilaasortaasunit kiisalu nunanit ataavartumik alaatsinaattutut inissisimasunit peqataaffigineqassaaq. Tassungalu Kalaallit Nunaat Savalimmiullu aamma peqataassapput.
Ataatsimiinneq arfininngorpat naammassineqassaaq, siulittaasuuffillu Leona Aglukkap Canada sinnerlugu USA-mut, ukiuni tullerni marlunni siulittaasuutitaqartussamut, nunanut allanut ministeriusumut John Kerrymut tunniutissavaa.
