Lars-Emil Johansen: Nunarput inerinnerusimasoq qineqqusaarnerup takutippaa

Qineqqusaarneq torersumik paasissutissanillu tunngavilersuilluarluni ingerlanneqarpoq. Lars-Emil Johansen KNR-ip qinersineq pillugu marlunngornermi unnukkut aallakaatitsinerani taama oqarpoq.
Assi © : KNR
apriilip 24-at 2018 22:43
Nutserisoq Simon Uldum

Lars-Emil Johansen Inatsisartunut qinersinissaq suaarutigineqarmat qinigassanngorteqqinngilaq. Qineqqusaarnerlu toqqaannartumik peqataaffiginnginnamiuk qineqqusaartut tamaasa malinnaaffiginissaat piffissaqarfiginerusimavaa.

Politikeritoqarlu isumaqarpoq maanna qineqqusaarneq allaanerusumik ingerlanneqarsimasoq.

AAMMA ATUARUK Nunaqarfimmiut qineqqusaarnermi qaangiinnarneqartutut misigisimasut

- Qineqqusaarneq assorsuaq torerpoq, aamma oqaluuserisanut assut ilisimasaqarput. Nuannaraara, tassuuna aamma siuariarneqarsimavoq annertuumik. Ilaa soorlu kisitsisinik uppernarsaatinik taasaqarsinnaaneq. Imaaliartorput imaluunniit suliffissaaleqineq milliartorpoq, imaluunniit aningaasarsiorneq milliartorpoq. Taakkua ersarinnerusumik saqqummiussiffigisarlugu oqallittoqarpoq, Lars-Emil Johansen oqarpoq.

Taanna isumaqarpoq nunarput naalakkersuinikkut inerinnerusimasoq.

AAMMA ATUARUK MIO er tilfreds med valgkampen

- Isumaqarpunga nunarput inerinnerusimasoq. Oqarutta ukiut 47-t matuma siornatigumut naleqqiullugu inerinnerujussuusimavoq. Aamma taamanikkut oqartussaaffeqannginnatta anginerusumik, nunarput sutigut tamatigut Danmarkimit aqunneqarmat. Uagut Danmarkimut qanoq oqariartuuteqarnissarput annerusumik eqqartorparput. Ullumikkut oqartussaaffippassuit nammineq tigummivagut, tamakkiisumik suli namminersulersimanngikkaluarpugut, kisianni namminersorneq angeqaaq ullumikkut. Aamma isumaqarpunga tamanna malunnartoq politikerit inerikkiartorsimanerat ukiut ingerlaneranni tassuuna takuneqarsinnaammat, Lars-Emil Johansen taama oqarpoq.