Pipaluk: Nunarput ilisimaneqarnerulissaaq
Nunatsinni international filmfestivaaleqartalerneranut aaqqissueqataasup, filmimillu ilitsersuisartup, Pipaluk K. Jørgensenip, nunarsuarmioqataanermut malunnarnerulersitsissasoraa. Taamaalilluni nunatsinni suut filmiliarineqarsimanersut suullu filmiliarineqarsinnaanersut aamma periarfissatut isigineqarnerulernissaanut iluaqutaasussaq qularinngilaa.
-Nunarsuarmioqatitsinnut isigut ammarnerusariaqarpagut, taakkualu aggersarnerullugit, sunillu maani tunniussasaqarnerluta takutillugit. Taava aamma uagut taakku sunik neqerooruteqarsinnaanersut ammaffigisariaqarpavut, Pipaluk K. Jørgensen taama oqarpoq.
AAMMA ATUARUK Nuuk International Film Festival aallartittoq
Nunanit assigiinngitsuneersunik filmiliortunik maanna Nuummiittoqarpoq, ilaatigut naggueqatitsinnik. Nuuk international filmfestivaleqarnerani filmit assigiinngitsut 17-it issittumi filmiliat nersualaarneqarsimasut takutinneqassapput. Tamanna nunatsinni filmiliortarnerup ukiuni kingullerni siuariartorneranut takussutissaasoq aaqqissueqataasoq isumaqarpoq. Siuariartuinnarnerlu pingaaruteqartoq taanna oqarpoq.
- Filminik nalliuttorsiutiginninneruvoq, tulluusimaarutigisariaqarparput ukiut kingulliit qulit filmiliornerup silarsuaa isigissagaanni siumut aallariarujussuarnikuuvugut. ukiut 20-t matuma siorna qiviassagaanni soqanngilaq, Pipaluk K. Jørgensen KNR-imut oqarpoq.
Nuuk Filmfestival pingasunngornermiit arfininngorneq ilanngullugu Katuami ingerlanneqassaaq.