Nunarput Danmarkilu inuit pinnguaataannik ullumi unammilersut
Nunalli akornanni unammineq nalinginnaasuussanngilaq, alutorsaatigineqarluarnissaali qularnanngilaq.
Nunatsinni timersortartut pingasut Arctic Winter Gamesimut peqataasussat danskit "nunanut allanut unammisartui" unammissavaat. Nunanut allanut unammisartut, unamminissamut pilersaarut malillugu tassaapput illunik tuniniaasartoq angut pualasooq hold østimeersoq, illunik tuniniaasartoq saluttoq pujortaamasoq hold vestimeersoq kiisalu tv-mi aallakaatitassiami aqutsisut nunarsuarmi anginersarigunagaat pikkorlunnersarigunagaallu.
Tassalu Danmarkimi tv-kkut aallakaatitassiami Hammerslagimi (Kaattaassineq, aaqq.) inuttaasut ulluni makkunani Nunatsinniittut, timersuutigisartakkatsinnillu immikkut sammisaqarusuttut.
AAMMA ATUARUK Kaattaassineq Nunatsinni
Unammissutigisassaat tassaapput one foot High kick, airplane aamma head pull.
Unamminerit Nuummi Ilinniarnertuunngorniarfiup timersortarfeeraani ullumi sisamanngornermi nal. 17-19 pissapput. Kalaallit Nunaannik illersuiartorusuttut Danmarkimillu aliikkusersorneqarusuttut tamarmik tikilluaqqusaasut, aallakaatitassiami aqutsisup Christian Degnip oqaatigaa, ilanngulluguli aamma isiginnaariat qinnuteqarfigai.
- Aamma Danmark illersulaartariaqassavarsi - pisariaqarteqaarput!!
Hammerslagimeersut immiussiatorlutik ulluni makkunani Nuummiipput. Kingorna Nunatsinni sumiiffimmut allamukassapput, sumukarnissaalli suli isertuunneqarpoq illunik tuniniaasartut piareersaateqannginniassammata.
