Kaattaassineq Nunatsinni
Illunik tuniniaasartunut illut akiinik eqqoriaasitsilluni Kaattaassineq aallakaatinneqartarpoq. Kalaallit Nunaannullu eqqoriaasitsiartornerat qanoq kalaallit najugaqarneranut danskinut takutitsissasoq, aallakaatitassiortut naatsorsuutigaat.
- Illunik alakkarterissaagut, kalaallit qanoq illoqarnersut takuniarlugu. Tamannalu kalaallit ullutsinni 2015-imi qanoq inooriaaseqarnerannut danskinut paasititsilluassasoq ilimagaara, Christian Degn Kaattaassinermi aallakaatitsinermi ingerlatsisoq taama oqarpoq.
Kalaallit Nunaanni immiussinerat juullimi aallakaatinneqassaaq.
Nunatsinni najugallit ataasiaannarnatik aperineqarlutik misiginikuussavaat suli illuikkiani najugaqarnersugut, puisinniarnermillu inuussuteqarnersugut.
Taamatukannerlu aamma Kaattaassinermi inuttaasoq eqqarsarsimanini isertuutinngilaa. Pisutsillu ilimagisaminit allaaneroqisut tupaallaatiginerarpaa.
- Kalaallit Nunaannukalerama naatsorsuutigisimavara illut qisunnik sanaajusut, iserlugit tarrajuttut immaqalu aamma silataani puiseqartoq pisaarlaamik. Kisianni oqarusuppunga, illut maani kusanarluinnarmata assut tupallunga, Christian Degn oqarpoq.
Aamma atuaruk AWG 2016: Ammaanersiornermik misiliineq
Nuummi illut sinerissap sinneranut sanilliukkaanni akisupput, illunik tuniniaasartut ilaata nittartagaa naapertorlugu, ilaqutariinnut illu 80 m2-iusoq 2 millionit koruuninik naleqariaannaalluni.
Akillu illunik tuniniaasartunut isertuussaapput. Kisianni Christian Degnip oqaatigaa illunut pisiassanullu allanut akit qaffasinnerusut malugisimallugu.
- Akit misissuataarpakka, kisianni qanoq qaffasitsiginersut oqarnianngilanga, illunik tuniniaasartut namminneq eqqoriartussaammatigit. Kisianni oqarsinnaavunga Brugsenimi Pisiffimmilu pisiassat akii takugakkit, maluginiarpara Danmarkimit qaffasinnerusut, Kaattaassinermi aallakaatitsinermi ingerlatsisoq Christian Degn taama oqarpoq.
Kalaallit kulturiat
Tikeraalli akinik eqqoriaaginnassanngillat, kalaallit kulturiat aamma misigisaqarfigissavaat. Kalaallit Nunaat Danmarkilu suli Inuit Gamesimi unamminikuunngitsut aaqqissuisut paasigamikku, aalajangersimapput peqataasut pissartanngorniutissasut.
- Taamaaliorniartugut peqataasussat suli naluaat, angutitagulli marluk Nuummi ilinniarnertuunngorniarfiup eqaarsaartarfiani kalaallinik unammisaqassapput, puisaasaq portusuumut nivinngagaq tukerlugu, airplanerlutik allallu. Ajorsangaatsiassaagut kisianni nuannissaqaaq. Tamannalu aamma kalaallit timersornermut kulturiannut takutitsinissamik siunertaqarpoq, Christian Degn oqarpoq.
Nuummi illut akii kisiisa anginaarneqanngillat, aamma aallakaatitassiortoq angisuupilussuaq illoqarfiup aqquserngini takussaavoq:
