Nunarput ajornartorsiulersinnaasut pillugit Aalborgimut ilisimatitsisarpoq
Tassami Aalborg Kommune ilaqutariit aalajangersimasut pillugit kommuniniit ilaqutariit aallarfigisaanniit paasissutissanik piumalluni KANUKOKA-mut qaammatialuit matuma siorna saaffiginnippoq:
- Saaffiginnimmata pingaartissimavarput, meeqqat pineqartut sapinngisamik naleqquttumik ikiorsinnaanisssat anguniarlugu, kommunit taakku sisamat saaffigineqarsinnaanissat aqqutissiuupparput, taamaalillutik ajornannginnerusumik ikiorneqarsinnaanerat anguniarlugu, KANUKOKA-p pisortaa, Martha Labansen oqarpoq. Taassumali maanna oqaluttuarisinaanngilaa, taama suleriaaseqarnissaq sumut killinnersoq.
Danmarkimi namminermi ilisimatitsisussaatitaaneq inatsisitigut ukiuni arlalinni atuuppoq. Malittarisassalli Naalagaaffeqatigiit akornanni atuutinngillat. Martha Labansenilli ilimagaa, taama periaaseqalernissaq, Nunatsinni Kommunit tapersersussagaat:
- Isumaqarpunga, tamatta ikiuukkusussasugut, meeqqat pineqartut pitsaanerpaamik sullinneqarnissaat anguniarlugu.
Ikiuunnerlu qanoq angitigissanersoq, Ilaqutariinnermut naalakkersuisoq, Mimi Karlsenip, danskit isumaginninnermut ministeriannut sapaatit akunnerata tulliani oqaloqatiginnissutigissavaa.
- Novembarip pingajuani naapeqqaassaagut kaffisoqatigiillutalu, tassanilu isumaqatigiikkumaarpugut, maanga tikeraarnissaa qanoq aaqqissorsinnaanerlugu. Taava ilaqutariit nunatsinniit nuuttut Danmarkimut nuunneranni ilisimatitseqatigiittarneq qanoq ingerlassinnaassaneripput, tassani tikeraarnerani oqaloqatigiissutigissavarput, Mimi Karlsen oqarpoq. Tassami aamma inatsisitigut eqqumaffigisassaqartoq, tikkuarpaa:
- Maannakkumummi nalunngilarput, inuit ataasiakkaat akuersitinnagit ilisimasanik nuussisoqarsinnanngitsoq. Kisianni nuuffigisamiit nuuffimmut paasissutissanik arlaannik pisariaqartitsisoqartarmat, aamma ilaqutariit arlaatigut ikiugasaappata taakkua nalunngissallugit iluaqutaasammata, qanoq periarfissarsiuussinnaanerlutigit maanna misissorniarparput, Mimi Karlsen oqarpoq.