Nunarput aamma nunaavoq nunaleriffiusoq
Karl Lyberth, qinigaaffimmi tullermi nunatsinni nunalerinermut politikkikkut siuttuusussap nunalerineq isumalluarnartoqartippaa. Nunalerinermi pissutsinik pitsanngorsaanissaq Nunatsinnilu imminut pilersorsinnaanerunissaq neriorsuutigaa.
-Nunalerineq ulluinnarni atortakkatsinnik suli amerlanerusunik tunisassiortilersillugu ineriartortissavarput. Kujataani savaatillit ingerlalluareerput, silallu kissakkiartornera ilutigalugu nunalerineq annikitsuinnarluunniit ukiuni aggersuni aningaasatigut isaatitsinissamut periarfissagissaarfiussaaq. Imminut sapinngisamik annerpaamik pilersorsinnaanissatta anguniarnissaa politikkikkut ikorfartuiffigisariaqarparput, Karl Lyberth knr.gl-imut oqarpoq.
Inuussutissarsiuut suungitsumit sinneqartooruteqarfiulluni ingerlatsiffiusussatut ineriartortinnissaa imaaliallagassaanngilaq, nunattali kujasinnerusortaani nunalerisut immikkut illuinnartuupput. Sila ilaatigut qinngasaarisaraluartoq ilungersorlutik sulipput. Ineriartortitsineq akisuujuvoq, Karl Lyberthilli aalisarnermut, piniarnermut nunalerinermullu naalakkersuisunngornermini inuussutissarsiuummut tassunga aningaasanik amerlanerusunik tunniussisoqarnissaanik neriorsuerusunngilaq.
-Suliniutit suut aningaasalersuiffigissallugit maannangaaq oqaatigissallugu siusippallaarsoraara. Nunatsinni nunalerinerup iluani ineriartortitsisoqarnera maluginiarpara, tamannalu nuannaarutigeqaara. Inuussutissarsiuut tapersersorparput, imaaliallaannarlunga checkimik nassissinnaanngilakka.Tamanna Inatsisartut ataatsimiinnerini eqqartortariaqarparput, tassanilu aalajangiinerit naapertorlugit aningaasaliissuteqarluta, Karl Lyberth nassuiaavoq.
