Nunarput Aalborgimi immikkut sammineqartoq
Aalborgimi Kalaallit Nunaat pillugu ulloqartitsisoqarnera tusagassiorfinnit sammineqarpallaarani aallartippoq. Tamanna kulturikkut illorsuarmi Nordkraftimi ippassaq ammaanersiornermi pivoq, qarlortartartorlu Arnannguaq Gerstrøm tusarnaartitsillunilu oqalugiarpoq.
- Kommuneqarfik Sermersuup tungaanit siunertaraarput Kalaallit Nunaata Danmarkimi nalinginnaasumik isigineqarneranit allaanerusumik nunarput takutissallugu. Tassalu assigiinngissutsinik takutitsinissaq, AC-konsulent Aviaja Absalonsen, Kommuneqarfik Sermersuup tungaanik aaqqissueqataasoq oqarpoq.
Taassuma qitittartoqatigiit Tasiilameersut Dance With Snowflakes immikkut eqqaavai.
- Peqataanerat pitsaalluinnarpoq - taamaalillutami Nunatsinnit allaanerusumik takutitsivugut - peqatigisaanillu aamma inuusuttut Kalaallit Nunaat kisiat pinagu allanik takusassaqassapput immaqalu ilinniarnissaminnut allatigulluunniit kajumilersinneqarlutik.
Kulturisiorluni pikialaartitsinerup kommunit akornanni assigiinngitsutigut suleqatigiittoqarnissaanik kinguneqarnissaa kommunimit neriuutigineqarpoq.
- Maaniinninni paasivara Nuummi NUIF-ip Aalborgimilu Fristedet akornanni suleqatigiinneq 2011-mi aallartinneqartoq suli atuuttoq aammalu kingorna paarlaasseqatigiittoqartarsimasoq. Kalaallit Nunaat pillugu ulloqartitsinerup tamakkuninnga pilersitsinissaanissaa neriuutigaarput.
Kalaallit Nunaat pillugu ulloqartitsineq sapaatit akunnerup nuannaffiup Aalborg i Rødtip ilaatut ingerlanneqarpoq. Dance with snowflakes arfininngorpat takutitsisussat saniatigut aamma atisanik takutitsisoqassaaq, assilisanik saqqummersitsisoqarluni, erinarsoqatigiit erinarsussallutik, qarlortaammik tværfløjtemik tusarnaartitsisoqarluni, malittuinnarnik akorseqattaarluni aliikkusersuisioqarluni taallanillu atuaasoqarluni. Nive Nielsen and the Deer Children aamma Small Time Giants tallimanngorpat arfininngorpallu tusarnaartitsissapput.
