Nunaqarfitsik uummaallatsinniarlugu peqatigiiffimmik pilersitsipput
Nunaqarfimmi Kapisilinni, nunaqarfik uummallatsinniarlugu peqatigiiffimmik pilersitsisoqarpoq, taaguuserlugu Kapisilik. Inuusuttut nunaqqatigiillu allat nunaqarfimminni sammisassaminnik amigaateqarnertik tungavigalugu peqatigiiffimmik pilersitsipput.
novembarip 30-at 2009 05:56
- Peqatigiiffiliornitsinni siunertaraarput timersornermik ilaatigut aallutaqassalluta, taavalu kalattoortartunik aallartitsiniarluta. Nunaqarfik nuannernerusoq uummaarinnerusorlu anguniassavarput, siulittaasutut inissikkallartoq, Martin Sikemsen, oqarpoq.
Taanna aamma oqarpoq sisoraatinik ujakkaartartunik aallartitserusullutik, aamma nunaqarfiup arsaattarfiani arsaqatigiittartussanik pilersitsiniassallutik.
Nunaqarfiup katersortarfiani ukiuni arlariinngortuni anartarfilersuineq, ullumimut suli naammassineqanngitsoq, peqqutaalluni katersortarfik atoqqusaanngilaq, taamaattumik katersortarfiup tigunissaa peqatigiiffiup aqqutissarsiussagaa, Martin Sikemsen oqarpoq.
