Nunaqarfinni najugaqartut napparsimaveqarfimmit kiffartuunneqarnertik toqqissisimanartinngilaat
Angutip 68-inik ukiullip nunaqarfimmi najugaqartup perulunnerata nalaani piaartumik ikiorneqarnissamik noqqaasoqarnera tusaaniarneqarsimanngilaq.
- Angut 68-inik ukiulik toquvoq, illoqarfimmi nappasimavimmit piaartumik ikiorneqanngimmat, ernutaasoq Sara Johansen Olsen oqarpoq.
Sara Johansenip aataava 68-ilik ukiulik Tasiusami Upernaviup nunaqarfiani najugalik, napparsimammat nunaqarfimmi nakorsaatinik paarsisup Upernavimmi napparsimavimmi sulisut piumaffigai, 68-nik ukiulik perululluni napparsimammat piaartumik aaneqassasoq.
Napparsimasunik paarsisoq oqarfigineqarpoq, 68-inik ukiulik nipaallissatinik Pamolinik tunineqassasoq, naak 68-inik ukiulik anernikilliorluni puammigut immattooqqasoq, ernutaasoq Sara Johansen Olsen oqarpoq. 68-inik ukiullip Upernaviup napparsimavianukaanneqarnissaanut noqqaasoqarmat, ilaqutaasut oqarfigineqarput, Tasiusami angallatilinnik nalunngisaqarunik, angallammik 68-inik ukiulik Upernaviliaanneqarsinnaannginnersoq. Sara Johansen Olsenip nunaqarfinni napparsimavinni ikiortit tusaaniarneqanngitsutut innerat isornartoqartippaa: "Soorlu upperineqarneq ajortut" Sara Johansen Olsen nammineerluni Upernavimmi nakorsamik niviarsiamillu attaveqartarluni, taakkua paasitippai aatani qanoq napparsimatiginersoq, perulutsiginersorlu. 68-inik ukiullip perululluni napparsimasup, piaartumillu nakorsamit misissorneqarlunilu ikiorneqartariaqartoq. Upernavimmi napparsimaveqarfik 68-nik ukiullip ikiorneqartariaqarneranik saaffigineqarnerata aqaguani, nakorsaq Tasiusamukarpoq, apuuteqqammersorlu 68-inik ukiulik ikiorneqarsinnaasimanngilaq, kingornalu toquvoq. Toqunerata kingorna paasineqarpoq, 68-inik ukiulik puammigut imeqarsimasoq aammalu sukkornermik nappaateqartoq paasineqarluni.
"Nunaqarfinni napparsimavinni ikiortit tusaaniarneqarnerusariaqarput" Sara Johansen Olsen oqarpoq.
Nunaqarfinni napparsimallutik peruluttut illoqarfinni napparsimavinnit kiffartuunneqarnerisa ajornerat pissutigalugu nunaqarfimmiut arlaqartut toqusut Sara Johansen Olsenip tusartareerpai. 68-inik ukiullip napparsimaveqarfimmit kiffartuunneqarnera ajoralugu, naammagittaalliuummik Sara Johansen Olsen allagaqarniarpoq.
Upernavimmi napparsimaviup pisortaa Tasiusami pisoq pillugu oqaaseqartinniarsimagaluarparput tamannali iluatsissinnaasimanngilarput.
Tasiusami nakorsaatinik paarsisoq oqarpoq, angut 68-inik ukiulik napparsimalerami erngerluni nakorsiartarfiliarsimasussaagaluartoq, ikiorneqarneqarnissamik noqqaalluni.
