Nunaqarfinni inatsisitigut atukkat politikerit isornartorsiorpaat
![](/sites/default/files/styles/image_934x467/public/article_images/aaja_chemnitz_larsen_og_aleqa_hammond_2.jpg?itok=NCZh307U)
Folketingimi kalaallit politikerit piumasaraat innuttaasut inatsisitigut isumannaatsuunerat Danmarkimisulli qaffasitsigissasoq, soorlu nunaqarfiit tamarmik kommunefogedeqarnerisigut. Siumumit Aleqa Hammond KNR-imut ima oqarpoq:
- Nunaqarfinni aqqaneq marlunni inatsisinik atuutsitsinermut attuumassuteqartunik sinniisoqannginnerat, inuillu kommuninit- inatsisinillu atuutsitsisussat akisussaaffiinit sinniisoqannginnerat Kalaallit Nunaanni inatsisitigut isumannaatsuunissaannut eqqunngitsuliorneruvoq.
Politimesteri: Inatsisitigut isumannaatsuupput
Nunatsinni politimesteri Bjørn Bay KNR-imut oqarpoq nunaqarfiit tamarmik kommunefogedeqarnissaat isumaqatigigaluarlugu. Nunaqarfinnili kommunefogedeqanngitsuni innuttaasut inatsisitigut isumannaatsuunerat eqqunngitsuliornerunngittoq.
Tamakkunanimi innuttaasut illoqarfimmit qaninnerpaami politiinit isumagineqartartut.
Aleqa Hammonili isumaqataanngilaq.
- Politeeqarfik qaninneq kilomeeterinik untritilinnik arlalinnik ungasitsigisumiippat, nunaqarfimmi eqqunngitsuliorfigineqartutut misigigaanni inummillu saaffigisassaqarani misigisimassavaat salliutinneqaratik, Aleqa Hammond oqarpoq.
Aaja: Kommunefogedi pisariaqartinneqaleriataarsinnaavoq
Inuit Ataqatigiit folketingimi ilaasortaatitaata Aaja Chemnitz Larsenip nunaqarfinni amerlavallaani atugassarititaasut aamma naammaginannginnerarpai.
- Isumaqarpunga anguniagarput annikilliliivigineqassanngitsoq oqarluni nunaqarfiit ilaat pisariaqartitsipput allallu pisariaqartitsinatik. Imaaliallaannarmi kommunefogedi pisariaqartinneqaleriataarsinnaasoq, Aaja Chemitz Larsen KNR-imut oqarpoq.
Folketingimut ilaasortat marluullutik nalunaarput Naalagaaffiup politiivisa pisortaat qaammammi uani ataatsimeeqatigilerunikku kommunefogedinut tunngasoq sammeqqinniarpaat.