Nunaqarfinni atuartut ungasianiit atuartinneqartalernissaat siunnersuutigineqarpoq
Nunaqarfinni ilinniartitsisussaaleqineq iliuuseqarfigineqassappat susassaqartut isumasioqatigiinnerisigut aaqqiivigineqarsinnaasoq, KANUNUPE-mi siulittaasoq Jens Kristian Therkelsen isumaqarpoq.
- Nunarput tamakkerlugu nunaqarfippassuugatta ilinniarsimasunik atorfinititsiniarneq tamakkiisumik nunaqarfinni tamani tamkorlooruminaassinnaavoq. Kisianni aamma pitsannguutaasinnaasutut isigisarparput, sapinngisamik ungasianiit atuartitsinerup piffissami qanittumi atulersinneqarsinnaanera piviusunngorsinnaassagaluarpat, Jens Kristian Therkelsen oqarpoq.
KANUKOKA-mit paasissutissat malillugit ukiumi atuarfiusumi 2007-miit 2008-imut atorfiit 70.7 procentii ilinniartitsisunit ilinniarsimasunit inuttaqarput. Ukiorlu taanna nunaqarfinni iliniartitsisut ilinniarsimasut 11-nik amerligaluarput. Kisitsisinili aamma erserpoq, meeqqat atuarfianni atuartut ukiuni kingullerni ikiliartortut, taamaasilluni ilinniartitsisut pisariaqartinneqartut ikiliartorlutik.
Atorfiit ilinniartitsisunit ilinniarsimasunit inuttaqarnerulersimagaluartut, nunaqarfinni ilinniartitsisussaaleqineq suli pitsanngoriaateqanngitsoq, KANUNUPE-p siulittaasuanit oqaatigineqarpoq.
- Kisitsisitigut ilinniartitsisussaaleqineq pitsannguallassimagaluartoq, isumaqarpugut ilinniarsimasunik ilinniartitsisussaqarniarneq, nunaqarfiit ataatsimut isigalugit, taamatukanniinnaq inissisimasutut ukiut kingullit ingerlasoq, Jens Kristian Therkelsen oqarpoq.