Nunaqarfinni aqutsisunngoraluartut tunuartitaapput
Qinikkat qinigaasinnaanerminnik annaasaqartut pinerluttulerinermut inatsisinik taamatullu inatsisartut inatsisaannik unioqqutitsisimanerat pissutigalugu qinigaasinnaanertik annaavaat.
Qinigaasinnaanerminnik annaasaqartut tassapput: Jenseeraq Hansen kommune kujallermi qinigaasoq, Jørgen Jeremiassen Qaasuitsup kommuneani nunaqarfinni aqutsisunut sinniisussatut qinigaasoq , Hans Karls Olsen Qeqqata kommuneani qinigaasoq, Ole Larsen Kommuneqarfik Sermersuumi qinigaasoq, Hans Jørgen Lukassen Qaasuitsup kommuneani qinigaasoq, Klement Poulsen Qeqqata kommuneani nunaqarfimmi aqutsisuni sinniisussatut siullertut qinigaasoq, Ole Eliassen Qaasuitsup kommuneani qinigaasoq, kiisalu Hans Thomassen Qaasuitsup kommuneani nunaqarfinni aqutsisunut sinniisusssat pingajuattut qinigaasoq, qinigaasinnaanitik annaavaat.
Qinigaasinnaanerminnik annaasaqartut ilaat qimminik naalliutitsisimaneq piaaralunilu qimminik toqutsisimaneq pillugu akiliisinneqarnissaannik pineqaatissinneqarsimanera aallaavigalugu qinigaasinnaanini annaavaa. Aqutsisunut qinikkat sisamat persuttaasimanertik pissutigalugu pineqaatissinneqarsimanermikkut qinigaanertik annaavaat.
Qinigaasoq ataaseq aqqusinermi angallannermi inatsimmik unioqqutitsivoq imigassartorsimalluni biilimik ingerlatsisimanera pillugu biilernermut allagaqartaanik arsaarneqarnini pineqaatissiissutigimmagu. Aqutsisunut qinigaq ataaseq najugaqarfiginngisamini eqqissiviiliortitsimanini aammalu kinguaassiuutitigut kannguttaatsuliorsimanini pillugu ukioq 2005-imi eqqartuunneqarluni pineqaatissinneqarpoq, tamalillunilu qinigaasinnaassutsinni annaallugu.
Nunaqarfinni aqutsisunut qinersinermi ukioq 2005-imi qinigaasut akornanni 15-it qinigaasinnaanertik annaavat.
