Nunaqarfimmiut ukiut 20-t qaangiuppata affaannanngussapput
Ineriartornerup kingunerissavaa nunaqarfiit inullit ukiut 20-t tulliuttut ingerlanerini affaannanngornissaat, Kalaallit Nunaanni inuit nuttarnerannik misissuinerup inernerisa saqqummersinneqartut takutippaat.
Qanoq nuttartigaagut? Sumut nuuttarpugut? Sooq nuuttarpugut? Siunissami allamut nuukkusussinnaavugut? Apeqqutit taamaattut inuit nuttarnerannik misissuinerup nutaap inernerisa akissutissaqalersippaat.
Misissuineq 2008-mi aallartippoq, taamani inatsisartut upernaakkut ataatsimiinnerminni najugaqariaatsip qanoq issusia paaserusummassuk.
- Nunaqarfiit ilaasa siunissaat nalorninartoqarpoq. Misissukkattami takutippaat sukumiisumik ineriartortitsinerit nunaqarfiit piuginnarnissaannut kisimik apeqqutaasut, nalunaarusiornermi aqutsisoq ilisimatooq Rasmus Ole Rasmussen oqarpoq.
Nunaqarfiit amerlanersaasa ukiuni qulini kingullerni inuerukkiartuinnarnerat takussutissaalluarnerarpaa, oqarluni Europap kitaanisulli nunatsinni pisoqartoq.
Innuttaasut ukioqqortusigaluttuinnarput meeqqallu inunngortartut ikiligaluttuinnarlutik. Inuusuttut inuussutissarsiutinik ujartuillutik nuttartarput, nunaqarfinni pilersuisussat ikiligaluttuinnarnerannik kinguneqartumik.
- Ukioq 2030-ip tungaanut ineriartornerup qanoq innissaa misissorparput, takusinnaavarpulli nunaqarfinni innuttaasut taamanikkussamut affaannanngoreersimassasut.
Inoqarfinnit minnerusunit inoqarfinnut annernut nuttarneq naggataagut Nuummut nunanulluunniit allanut nuttarneq nunatsinni takussaaleriartorpoq, soorlu nunani allani taama pisartut.
Nuttartut 15-iniit 26-nut ukiullit amerlanerpaartaasarput. Taakkuupput meeqqat atuarfiat naammassereeraangamikku siunissami inuussutissarsiutigilerumaagassatik pillugit nuttarnerpaat.
Misissuinerup aamma takutippaa arnat ilinniariarlutik aallartartuni amerlanerpaasut.
Pissutsit taamaaginnassappata arnat Kalaallit Nunaanni ikippallaalersinnaapput, nuttannginnerpaammi tassaammata angutit, aalisarnermik piniarnermillu inuussutissarsiuteqartut.
- Ilinniagaqarnissaq pingaartinneqariartortillugu sumiiffiit suliffissaqarfiusut nuuffiginissaat kajungerineqarnerusarpoq. Pingaartumik inuusuttut akornanni, tamannalu inuusuttut nuttarnerunerata takutippaa, Rasmus Ole Rasmussen oqarpoq.
Misissuinerup takutippaa nuuttartut marlunnut avinneqarsinnaasut - nuukkallartut nuuittullu. Nuukkallartartut tassaapput inuit ilinniagartuujunngitsut akissaatikitsullu, nunaqarfitsik qimallugu illoqarfimmut suliartornertik pillugu nuukkallarsimariarlutik nunaminnut uteqqittartut. Nuuillutik nuuttut tassaanerup ilinniagartunerit, atorfiit akissaatillu qaffasissut pillugit nuuttartut.
