Qulaarpaa Nunaqarfimmiut tusagassiuutinit sammineqarnerusariaqartut
Transparency Greenland, peqatigiiffik ammanerusumik peqquserlunnertaqanngitsumillu ingerlatsisoqarnissaanik anguniagalik taama isumaqarpoq.
Nunaqarfinni illoqarfinnilu pingaaruteqartunik pisoqaraangat tusagassiuutit soqutiginninnerusariaqarput. Peqatigiiffiup siulittaasua Anita Hoffer taama oqarpoq:
- Illoqarfinni nunaqarfinnilu innuttaasut tusagassiuutini saqqumilaarnerunissartik soqutiginerusariaqarpaat, tusagassiuutillu akerlianik aamma illoqarfinni nunaqarfinnilu pisunik soqutiginninnerusariaqarlutik, Transparency Greenlandip siulittaasua Anita Hoffer oqarpoq.
Nuna isorartooq - tusagassiuutit ikitsuinnaat
Nunattali isorartunerujussua, tusagassiuutillu ikittuinnaanerat pissutaalluni tamakkiinerusumik tusagassiisoqarsinnaanera killeqarpoq:
- Nunatta isorartunerujussua attaveqarniarnikkullu pissutsit assigiinnginnerujussuat soorunami pissutaaqataavoq, nutaarsiassanik siammarterisinnaanissaq ilaatigut killeqarsinnaavoq, tamakkiinerusumik ilaatigut tusagassiisoqarsinnaanani, Anita Hoffer oqarpoq.
AAMMA ATUARUK Nunatsinni tusagassiuutit sammineqassapput
Soqutiginnittoqarnerusariaqartorli erseqqissaatigaa, nunaqarfiillu tusaaniarneqarnerusariaqarnerat kissaatigalugu:
- Taamaalisoqanngippat pissutsit ajornerulissapput, soqutiginninnerlu immaqa annikinnerulissalluni. Pingaartumik nunaqarfinni, taakkumi tusaaniarneqanngitsutut misigilersinnaapput, taakkuali namminneq soqutiginninngippata aamma taava tamat oqartussaaqataanerat killeqalersinnaavoq, Transparency Greenlandip siulittaasua Anita Hoffer oqarpoq.
