Qulaarpaa Nunatsinni tusagassiuutit sammineqassapput

Tusagassiuutit pillugit ersarluttumik politikkeqartoqarpoq, taamaammat Qulaarpaami siunissamut tusagassiuutit qanoq atorneqassanersut sammineqassapput.

Nunatsinni erseqqarissumik tusagassiuutinut politikkeqanngilaq. Aviisinut tapiissutit annikillineqartuarput, soorlu aamma Sermitsiaq.AG-p suliffissanik nittarsaassinermi aningaasat pisartagaat Namminersorlutik Oqartussanit peerneqartut.

KNR nittartakkatigut ussassaarusioqqusaanani ussassaarusiorpoq taamatullu radiukkut aallakaatitsivik Nuummi taammaallaat aallakaatitsisoq aallakaatileraluarpaa, tamannalu inatsisitigut unioqutitsisutut nalilerneqarpoq.

Tamanna KNR-imi aqutsisut akerlilerpaat, oqaatigineqarporlu KNR pillugu inatsisit ersarluttut. 

Taanaannaanngilarli. Kiffartuusinissamut isumaqatigiissut politikkerinit aamma annertuumik oqaluuserineqalerpoq. Oqaluuserineqarnerani pisuutitsinerit imaaginnavipput, kiffartuussinissamulli isumaqatigiissut politikkerinit isumagineqartussaasoq puigoneqarsimasutullusooq illuni.

 

Tusagassiuutit nukittuut 

Tusagassiuutit pillugit nassuiaat 2010-imi saqummiunneqarpoq, taaguuserneqarsimasoq Tusagassiuutit nukittuut  tassani allaaserineqarlutik siunissamut isigisumik tusagassiuutini iliuusissat.

Nassuiaammi ilaatigut allaqqavoq KNR Namminersorlutik Oqartussanit tigummineerutissasoq, taamatullu aningaasanik amerlanernik aningaasaliiffigineqartalissasoq.

Nunat avannarlerni aningaasaleeriaatsit atorneqalernissaat siunnertanut ilaatigut aamma ilaapput. Soorlu innersuussutigineqartoq aningaasaateqarfinnit sunulluunniit attuumaassuteqanngitsunit aningaasaliinnerit ingerlanneqalernissaat, taamaasilluni politikkikkut aningaasaliissutaasartut sillimmatigineqarunnaarlutik.     

Tamakkuli tamarmik piviusunngunngillat.

Tusagassiiuutit pillugit isummertariaatsit assigiinngeqaat, unammillernissaannullu aningaasat aporfiujuarlutik.

Nunatsinni tusagassiuutit qanoq siunissami atorniarpagut? Qulaarpaa sisamanngorpat aallakaatinneqartussami nunatsinni tusagassiuutit sammineqassapput.

 

Aamma takuuk Qulaarpaa-p immikkoortua knr.gl/qulaarpaa

 

Isummersuutit


 

Pages