Nunaqarfimmiut illoqarfimmiunit sukkornerusarput
Kalaallimmi quliugaangata ataaseq sukkornermik nappaateqalertarpoq, tassa qallunaanut naleqqiullugu amerlassusaat marloriaataalluni.
Kalaallit Nunaanni sukkornermik nappaateqalertartut akornanni nerivallaarneq timilluunniit aalatinngippallaarneranik aallaaveqanngilaq.
Københavnimi sukkortunik sullissiveqarfimmi Steno Diabetes Centerimi ilisimatusarnermi nakorsaaneq Marit Eika Jørgensen Ritzauimut taama oqaluttuarpoq.
- Tupaallaatigeqisatsinnilli Kalaallit nunaqarfimmiut akornanni sukkornermik nappaateqalillattaarnerusarneri paasivarput, Marit Jørgensen oqarpoq.
Nunaqarfimmiummi timitik atornerusarpaat, puisip arferullu neqaanik peqqinaqisunik nerinerusarlutik. Taamaammat sukkortalernerusarnerinik paasisaq uissuummissutigineqarpoq.
Ukiummi qulit matuma siornali nunaqarfimmiut sukkornerulersarneri paasineqaqqaarmalli misissuinermi kukkusoqarsimasoralugu nipangiutiinnarneqaqqaarsimavoq. Maannali misissueqqittoqarmat tamanna ilumoortoq paasinarsilluni.
- Taamaammat nunaqarfimmiut sukkornermik nappaalanerulertarnerisa aallaaviat timiisa sananeqaataaneersuunersut imaluunniit inunngoraangamik oqinnerusarneri aallaaviunersut maanna missorlugit aallartipparput. Marit Eika Jørgensen oqaluttuarpoq.
Nunaqarfimmiummi qallunaanik akuugaannginnerupput, nunaqarfinnilu nerisassaaleqilertarneq atugaanerusarluni.
- Naartunerummi nalaani nerisat allanngorarpallaarsimanngippata meeqqap naartugisap nukissani sipaarniarlugu alliartornini arriillisarpaa, tassalu siunissami nerisakilliulissangaluarpat sukkornermik naappaateqalernissamut qaninnerulersinnaasarluni. Marit Eika Jørgensen oqarpoq.
Ilimagisammi naapertorlugit piniartoqarfimmiut akornanni pissakilliortoqartarsinnaammat inuit piniarnermik inuutissarsiuteqartut puallajanerusariaqartarsorineqarput. Tassalu timip taamatut periuseqarnerata kinguneranik inuit amigaateqaratik piffinni nutaani inuuleraangamik puallajasuupilussuanngortarsorineqarlutik.
Nunaqarfimmiulli sukkornermik nappaateqalernissamut qaninnerusarneri nerisarisaasa aallaaviunissaat Marit Eika Jørgensenip ilimaginnginnerarpaa.
Ph-d-nngorniutigaluguli nalunaarusiaq nutaaq Charlotte Jeppesenip allassimasaa naapertorlugu inuit kalaaliminertuumanerusut sukkornermik nappaateqalernissamut qaninnerusarput.
- Taamattoqarnerangaanera tupaallaatigaarput. Uagummi isumarput naapertorlugu sukkornermik nappaateqalertarneq kalaaliminertornermit aallaaveqassangatinnginnatsigu, Marit Eika Jørgensen oqaluttuarpoq.
