Nunaqarfik pisiniarfeqanngitsoq pilersorneqarusuppoq

Nunaqarfiummi tullianut, Tasiusamut, silap kissatsikkiartornera ilutigalugu pisiniarfiliartarnerat ajorsiartorpoq.

- Sila ajoraangat soorunami nikissinnaasanngilagut, naak Tasiusami pisariaqartitsigaluarluta pisiniarfimmi ulluinnarni inuussutissatsinnik. Tassa taanna ajornartorsiutaasarpoq. Aamma ukiukkut siku pitsaasuuinnarneq ajorami. Annermik ukiuni kingullerni silaannaap kissakkiartornera aallaavigalugu siku annikilliartorami Tasiusap tungaanut. Taamaammat suli ajornarsiartorpoq Tasiusamut pisiniarfiliarniartarnerput.

Hans Sakariassen, Nutaarmiuni inuit 37 innuttaasut ilaat, oqarpoq, imalu nangippoq:

- Taamaammat pisariaqavikkaluarpoq allatuulli aamma inuugatta akileraartartuullutalu pisiniarfeeqqamik, inuinut naleqquttumik, pitaarnissaq. Imaluunniit pilersuiffigineqarnissaq kissaatiginartorujussuuvoq ukiuni qaninnerni, Hans Sakariassen oqarpoq.

Pilersuisoq: Namminersorlutik Oqartussat aalajangigassaraat

Pilersuisoq, Namminersorlutik Oqartussat isumaqatigiissuteqarfigalugit isorliunerusuni nunaqarfinnilu pilersuisussaatitaasoq, Nutaarmiormiunit saaffigineqarsimavoq:

- Taamatut kissaatit Naalakkersuisoqarnikkut isummerfigisussaassammata, aammalu kiffartuussinissamut isumaqatigiissummut ilannguttussaassammata, Naalakkersuisoqarfimmut ingerlateqqinnikuuarput, Pilersuisup pisortaa, Frederik Olsen, oqarpoq.

Kisianni Pilersuisoq Nutaarmiuni pisiniarfimmik ammaanissamut pilersaaruteqanngilaq:

- Tassami namminneq KNI piumaffigissanerlugu isumaqatigiissuteqarnikkut Nutaarmiuni pisiniarfimmik ammaassappat, taava Naalakkersuisoqarfimminngaanniit taamatut tutsiuttariaqassapput, Frederik Olsen oqarpoq.

Taamaakkaluartoq perlertoqanngilaq

Taamaammat Nutaarmiormiut arlaannik amigaateqalernerminni manna tikillugu periuserisartagartik atorlugu ingerlaqqiinnartariaqassapput:

- Allatut ajornartumik ikioqatigiinniarsarisarpugut, peqaraangatta naakkinnittarpugut Tasiusamukartoqarnissaanut. Qujanartumik suli perlertoqanngilaq taamaakkaluartoq. Qujanartumik ikioqatigiittaratta, Hans Sakariassen illariarluni taama oqarpoq.

Nutaarmiuniit Tasiusamut pisiniarfiliarnermi benziina 25 literi atorneqartarpoq.