Nunaqarfiit pillugit isumasioqatigiinneqarpoq
- Qeqqata Kommuniani inuussutissarsiutit suut piukkunnarpat? Takornariaqarneq, aalisarneq, piniarneq allatigullu inuussutissarsiutaasinnaasut qanoq ililluta aaqqissuussinnavagut, Qeqqata Kommuniani borgmesteri Hermann Berthelsen isumasioqatigiinnerup siunertai pillugit taama oqarpoq.
Qeqqata Kommuniata nunaqarfiutai isumasioqatigiinnermi sammineqarput, naalakkersuisullu pingasut tassani peqataassallutik. Karl Kristian Kruse Knud Kristiansenilu Kangerlussuarmiilereerput, Vittus Qujaukitsorlu pilersaarutit malillugit sisamanngorpat peqataalerumaarluni.
Naalakkersuisuninngaanniit ilaasoqarnera pingaaruteqartoq, Hermann Berthelsen isumaqarpoq.
- Qimmit nerisassai Ilulissanit Sisimiunut sananiaraanni taamatut, fabrikkimi Maniitsumi Lilleholmimi igitassaatit toqqaannarlugit tunniunneqarsinnaanngillat allaqqappata qimmit nerisassarigaat, kisianni allamik allagartaleraanni Maniitsuminngaanniit Sisimiunut soorlu apuussinnaasut, taamaammat tamakkua neriuppugut inatsisitigoorluni naalakkersuisutigoortumik aaqqinnneqartariaqartut, borgmesteri taama oqarpoq.
Nunaqarfiit tallimat sinniisui tikiutinngitsoorput
Sikusimanerali pissutaalluni nunaqarfinni arfiniliusuni ataasiinnaq ataatsimiiffissami sinniisussaqarpoq. Nunaqarfiilli sinniisussai aallarsinnaasimanngitsut allatigut peqataassapput.
- Atammimminngaanniit, Napasuminngaanniit, Kangaamiuninngaanniit, Sarfalimminngaanniit Itilliminngaanniillu takkussinnaasimanngillat. Taamaammat nunaqarfinninngaanneersut aamma Skype aqqutigalugu saqqummiussassaminnik saqqummiissapput, Qeqqata Kommuniani borgmesteri Hermann Berthelsen taama oqarpoq.
Inuussutissarsiutit suliffissaqartitsinerlu pillugit isumasioqatigiissitsinerup ukiut tamaasa ingerlanneqartarnissaa aallaaviugaluartoq, angalanermut aningaasartuutit amerlanerat pillugu ukiut tamaasa iluatsinneq ajortoq, Hermann Berthelsenip aamma oqaatigaa.