Nunaqarfiit inuttunerusut isertitsiveqartariaqarput
Kommunefogeqanngitsunimi pinerluttoqassagaluarpat nunaqarfiit ilarpassui tikinneqariaannaanngillat, Isak Christensen oqarpoq.
- Ukiap kaperlaallu nalaani taavalu timmisartumik angallaviunnginnerata nalaani sakkortuumik iliortoqarsimassappat imaaliallaannaq tikinneqarsinnaaneq ajoramik tamakkua, Kommunefogedit peqatigiiffiani siulittaasoq Isak Christensen taama oqarpoq.
Aamma atuaruk Politimesteri: Nunaqarfinni inatsisitigut isumannaatsumik inissisimasoqarpoq
Taamaalilluni Nunatsinni politimesteri, Bjørn Tegner Bay akerlilerpaa, taanna oqarmat, nunaqarfimmi aamma kommunefogedeqanngikkaluartuni innuttaasut inatsisitigut isumannaatsumik suli inissisimasut.
Nunaqarfinni 57-iusuni aqqaneq marluk kommunefogedeqanngillat. Kommunefogedeqareeraluartunilu perulluliortoqarsimatillugu isertitsivinnik unnuiffiusinnaasunik nunaqarfiit tallimat kisimik peqarput.
Unnuiffiusinnaasumilu isertitsiveqannginnera peqqutaalluni angerlarsimafimmi unnuisitsisariaqartarsimalluni Isak Christensenip oqaluttuaraa.
- Angerlarsimafimmi isaasalerlugu unnuititsinermik taaneqartarput sakkortuuliortoqarsimatillugu. Silaannarmilu unnuitissanngikkutsigu taava angerlarsimaffinnut inissinniartarpagut nammineq ilagalutigu.
Aamma atuaruk Nunaqarfinni inatsisitigut atukkat politikerit isornartorsiorpaat
Nunaqarfinnilu inuttunerusuni isertitsivineqarnissaq pisariaqartoq oqarpoq.
- Inuttugamik nunaqarfiit anginerit taavalu isertitsiveeqqanik pilersitsivigineqassappata tulluartutut isigivara, Isak Christensen oqarpoq.
Nunaqarfinni 57-iusuni tallimat isertitsiveqartut politimestereqarfiup paasissutissiissutigaa.