Nunaqarfiit ataatsimeersuarnerat aallartippoq

Inuit 150-it Ilulissanut ullumikkut apuutereerput, ulluni pingasuni "inuunerinneq" oqallisigissallugu, suleqatigiiaarlutillu siunissami sulissutigineqartussat ukkatareqatigiissallugit.

Ataatsimeesuarnermut pilersaarutini oqallittarnissanut ilaapput, inoqarfiit minnerit pillugit takorluukkat. Oqallisaasussani tigussaasunut ilaapput "inuussutissarsiutit inoqarfiillu minnerit", "isumaginninnikkut aaqqissuussinerit, peqqinnissaq avatangiisillu".

2009-mili nunarsuarmi aningaasarsiornikkut ajornartoornerup kinguneri suli malunnaateqassapput, aamma nunaqarfiit siunissaasa oqallisigineqarnerini. Ullumikkummi oqallisigineqartussani pingaarnersaavoq Kalaallit Nunaata aningaasaqarnera, Aningaasaqarnermut Naalakkersuisoq aningaasaqarneq tamaat ataatsimut isigalugu saqqummiisussaammat, aningaasaqarnikkut unammilligassat nassuiaateqarfigalugit,  Kalaallit Nunaannilu pingaarnersiugassat pisariaqartut eqqartuiffigalugit.

Ataatsimeersuarnermi nunaqarfinni aqutsisoqarfiit 60-isut aallartitaat peqataassapput, soorluttaaq borgmesterit sisamaasut kommunalbestyrelsinilu ilaasortat peqataajumaartut. Aammattaaq Inuussutissarsiornermut Aatsitassanallu Naalakkersuisoq Jens Erik Kirkegaard qaaqqusisuusoq peqataassooq. Aningaasaqarnermut Naalakkersuisoq Vittus Qujaukitsoq, Ilinniartitaanermut Naalakkersuisoq Nick Nielsen, Ineqarnermut Naalakkersuisoq Sivert K. Heilmann, Peqqissutsimut Naalakkersuisoq Steen Lynge Isumaginninnermullu Naalakkersuisoq Martha Lund Olsen ataatsimeersuarnermi aamma siumorneqarsinnaapput.

Ataatsimeersuarnermi pilersaarusiaq Naalakkersuisut, KANUNUPE aamma KANUKOKA suleqatigeeqqissaarlutik suliarisimavaat.