Nunaqarfiit 16-it tunisassiorfittaarnissaat akuersissutigineqarpoq
Nunaqarfinnut illoqarfinnullu mikinerusunut annertuumik suliffissaaleqiffiusunut 20 millioni koruunit Kalaallit Nunaanni Namminersorlutik Oqartussat juunimi immikkut aningaasaliissutigaat, aningaasallu qulaani taasavut tassa taakkunannga pipput.
Arctic Green Foodimut 12 millioni koruuningajaat ukioq manna akuersissutigineqarput, Royal Greenlandimut 7,9 millioni koruunit.
Arctic Green Foodip naatsorsuutinik allattuinera pillugu suliffeqarfiup kukkunersiuisuata isornartorsiuingaatsiarsimanera maluginiarsimallugu Inatsisartut Aningaasaqarnermut ataatsimiititaliaata erseqqissaatigaa.
- Suliffeqarfimmiit nalunaarusiat Naalakkersuisut ataavartumik misissortassagaat naatsorsuutigaarput, Nunatta karsianit akiliutit kiffartuussinermut isumaqatigiissutip anguniagaanut ilumut atorneqarnersut qulakkeerneqarniassammat, Aningaasaqarnermut ataatsimiititaliami siulittaasoq, Akitsinnguaq Olsen, allappoq.
Kiffartuussinermut isumaqatigiissutit 2010-mi ingerlaqqissanngikkaluarpata Naalakkersuisut innuttaasunut ammasuunissaat unneqqarinnissaallu Aningaasaqarnermut ataatsimiititaliap kaammattuutigaa.
Nunaqarfinni isorliunerusunilu aalisakkanik assigiinngitsunik tunisisalernissaq kiffartuussinermut isumaqatigiissutip nutaap periarfissippaa. Soorlu Illoqqortoormiuni, Qaanaami, Savissivimmi, Ikamiuni, Attumi, Ikerasaarsummi, Kangaatsiami, Niaqornaarsummi, Kangerlussuarmi, Napasumi, Atammimmi, Kangaamiuni, Qeqertarsuatsiaani, Arsummi, Qassimiuni Narsarmiinilu.