Nunap sajunneranit eqqugaasunut katersuiniartoqaqaaq
Katersuiniarneq KNR-imit tapersersorneqarpoq, tamannalu Pulaarfimmi tassuugu arfineq-marlunut aallartittussami ingerlanneqassaaq. Tamatumunnga atatillugu Pulaarfik unnummut kalaallisut qallunaatullu ingerlanneqassaaq.
Katersuiniaatigaluni aallakaatitsineq Nuummi Katuamit ingerlanneqassaaq, aallakaatitsinerullu nalaani takkulluni aningaasanik tunissuteqartoqarsinnaalluni.
Aamma Nuummi Unnummi Kulturisiorfimmi aqagu unnukkut pisussami, Haitimiunut aningaasanik tunissuteqartoqarsinnaavoq. Unnummi Kulturisiorfimmi peqataasussat arlallit aningaasanik katersuiniaqataanissaminnut akuersisimapput, ilaatigut tassaasut naluttarfik Malik, Air Greenland, Pinngortitaleriffik, politiit, qatserisartut allarpassuillu. Atornikuerniarfik aqagu unnukkut qulit tungaanut ammassaaq, tassanngalu iluanaarutit tamarmik Haitimiunut tunniunneqassallutik.
Unnummi kulturisiorfimmi aningaasanik katersuiniartoqartussaanera pissutigalugu, Nuummi angerlarsimaffinnut orniguteqattaarluni katersuiniartoqassanngilaq. Sinerissamili illoqarfinni arlalinni angerlarsimaffinnut ornigulluni katersuiniartoqassaaq, ilaatigut Qaqortumi, Narsami, Narsarsuarmi, Sisimiuni, Ilulissani aamma Qasigiannguani - illoqarfinni taakkunani Røde Korsimeersut angerlarsimaffinnut ataasiakkaanut orniguttarlutik, januaarip 31-anni katersuiniassapput.
Tamatuma saniatigut Røde Korsimut sianerluni aningaasanik tunissuteqartoqarsinnaavoq. 25 koruuninik tunissuteqarniaraanni normu 163 sianerfigineqassaaq, 50 koruuninik tunissuteqarniaraani 166 sianerfigineqassalluni imaluunniit 100 koruuninik tunissuteqarniaraanni 169 sianerfigineqassaaq. Tamatuma saniatigut aningaaserivikkut aamma tunissuteqartoqarsinnaavoq kontomut uunga ikisinikkut: 6471- 8008008.
