Nunap inuii Ladamik tunissuteqarfigineqalersut

Eqqumiitsuliortup, Rosanna van Klaverenip, ingerlaarnermini filmiliutigissaaq, assigiinngitsunillu apersugaqarluni ilaatigut nunap inuii nunasiaateqarnerlu oqaluttuariniarpai – Københavnimit Stockholmimut atuakkiortoq danskeq-kalaaleq Iben Mondrup ilinniartut kalaallit marluk peqatigalugit ilaassapput. Angalaneq Belgiami, Rosanne van Klaverenip najugaqarfigisaani, sapaatit akunnera naanerani aallartippoq.

- Biiliutiga nuannareqqara, aqqusinersuakkooraangamali sajuttarpoq, soorlulusooq oqaluttuunniarlugu aqqusinermut taama ittumut sanaajunani nunaannakkulli ingerlaarnissamut sanaajulluni. Taava pilerunga Ruslandimut utertikkusullugu, nunaannakkut ingerlaartussanngorlugu, Rosanne van Klaveren oqaluttuarpoq.

Inuiaat Nenetit Ruslandip taigaata kippasissuani najugaqarput pininarnermillu tuttuuteqarnermillu inuuniuteqarlutik. Russilli aatsitassarsiornerat uuliasiorlutillu qillerinerat qangatut inooriaasiannik ulorinartorsiortitsivoq. Rosanne van Klaverenip inuiaat Nenetit ikiuutigalugit eqqumiitsuliornermik suliniutimigut, ajunngitsussaq pillugu iliuuserineqartartut iluaqutaanatik aserorterisinnaasarneri aamma oqallisaarutiginiarpaa.

- Qallunaajullunga – nunap inuiinik ikiuiniarnera - oqallisigineqartariaqarpoq. Qanga ajunngitsussaq pillugu qallunaat iliuuserisarsimasaat ajunngitsuinnaasarsimanngillat. Ineriartorneq pitsaasumut ingerlagaluartoq, aamma inunnut uumasunullu sumiiffimmiittunut akornusersuisinnaavoq.

Eqqumiitsuliortup Hollandimiup Issittoq soqutigisupilussuuaa, Nunarpullu arfineq marloriarluni tikeraareersimallugu. Tamannalu pissutigalugu Kalaallit Nunaat filmimut ilanngukkusuppaa.

- Inuiaat issittormiut taamatut attaveqaqalersinneqarsinnaapput.

Pilersaarut malillugu eqqumiitsuliornermik suliniut angallanneqartussaavoq, filmimilu biili pisoqaq Lada Niva takuneqarsinnaassalluni. Rosanne van Klaverenip aamma naatsorsuutigaa filmi kalaallit atuagaateqarfiinut kulturileriffiinullu siammartersinnaajumaarlugu.