Nunap ikuallaleraluarnerata kingorna politiit mianersoqqusipput

- Qasigiannguit kujataatungaanni kangerliumanermi paarnaqutit qeqqussallu 200 kvadratkilomerisut annertussusillit qatserisartutta pikkorissut qatserinnginneranni ikuallapput. Inunnik ajoqusertoqanngilaq ulorianartorsiortoqaraniluunniit, ikuallaffimmi najugaqarfigineqanngilaq.

Najugaqarfigineqanngikkaluartoq, Nipisami ikuallanneq inuit eqqagassanik maangaannaq qimatsisimanerannit pilersinneqarsimagunarpoq. Taamaammat politiit inuit kajumissaarpaat eqqagassanik, ikumatitsivigisimasanik grillerisimagunillu aamanik qamitsilluartaqqullugit, pingaartumik maanna nuna taama panertigitillugu.

- Sivisuumik sialoqannginnikuummat qeqqussat paarnaqulluillu maannakkut panertorujussuupput, seqinerlu Avannaani maanna kaaviinnarpoq, taamaammat nuna panertorujussuulluni. Igalaaminikoqarsimaguni taakku seqerngup kissarneranit qeqqussanik aamma ikuallatsitsilersinnaapput, imaassinnaavorli sissami aamma grillerisoqarsimasoq, aamallu qamilluarneqanngitsoorlutik. Taamammat sissami grillerisimagaanni suna tamaat isumannaarlugu qimanneqartariaqarpoq, taamaanngippat ullumimiit ajornerusumik pisoqarsinnaalluni, Karl Vinther, Qasigiannguani politiit pisortaat, Karl Vinther, naggasiivoq.