Nunap Aqqinik Aalajangiisartut qarsupinneqarput
Oqaasileriffiup Nunat Aqqinillu Aalajangiisartut, NAA Naalakkersuisut Geodatastyrelsenimik Danmarkimiittumik suleqateqarnissamik isumaqatigiissuteqarsimanerat nuannaarutigaat. Taakkua Nunatta nutaaliaasumik sukumiinerusumik pitsaasumillu nunap assiliuunneqarnissaa suliarisussaavaat.
Nunap assiliornera iluatsilluassappat, minnerunngitsumillu nunat aqqi eqqarsaatigalugit pitsaassusilimmik torersumik naammassissappata, NAA toqqaannartumik peqataatinneqartariaqartut, Oqaasileriffimmi allaffimmi pisortaq, Katti Frederiksen allappoq.
Oqaasileriffik NAA-lu isumaqarput isumaqatigiissusiornermi Naalakkersuisoqarfimmit NAA-mi suliassaqarfiit suuneri ilisimaqqissaarneqaratik nunat aqqinut tunngasut, ilanngullugit nunap assiliornermi Asiaq-mut suliassanngortinneqarsimasut. NAA Nunatsinni kisiartaalluni nunat aqqinik aalajangersaasinnaanermik akuersisinnaanermillu piginnaatitaavoq, taakkualu Oqaasileriffimmit sullitarineqartarput.
Nunap assiliornera torersumik suliarineqassappat NAA/Oqaasileriffik avaqqunneqarsinnaanngilaq nunat aqqinik akuerisanik, aammalu eqqortumik inissitsiterunermi NAA kisiartaalluni piginnaatitaammat. Tamanna sooq isumaqatigiissusiornermi Naalakkersuisoqarfiup eqqumaffigisimanngikkaa paasiuminaattoq, allakkani ammasuni Katti Frederiksen allappoq.
Nunap assiliornermi aallaqqaammat Nunatsinni sumiiffiit sisamaasut suliarineqassapput katillugit 10.596-inik nunat atertallit, taakkualu pitsaasumik eqqortumillu suliarineqarnissaanni NAA annertuumik akisussaaffeqarlunilu suliassaqarpoq.
Taamaattumik Aningaasaqarnermut Naalakkersuisoqarfik qinnuigaarput Nunat Aqqinik Aalajangiisartut suliassaqarfiisa suuneri qanorlu nunap assiliornermi inuiaqatigiinnilumi pingaaruteqartigineri ilisimaaqqissaarneraat akissuteqaqqullugu, Oqaasileriffimmiit allakkat ammasuni allapput.