NunaOilip siulittaasorisimasaa: Uuliamut politikki imminut assortorfiusoq
Nunatsinni uuliamik ujaasineq NunaOilip aallutassarigaa anguniagaavoq, uuliamillu suliaqarnissamut angorusutat annertupput. Namminersorlutillu oqartussat allaffissuani allatorluinnaq isikkoqarpoq.
Uuliasiornermik ingerlatseqatigiiffiup namminersorlutik oqartussanik pigineqartoq Naalakkersuisuugallartunit oktobarip aappaanni ingerlatseqatigiiffik affaannanngortissasoq susinnaajunnaarlugu nalunaarusiatigut inissinneqarpoq.
Naalakkersuisut affaasa akisussaaffimminniit tunuarneranniit sapaatip akunnera qaangiuttorlu Namminersorlutik oqartussat ingerlatseqatigiiffiit allattoqarfiata pisortat pigisaannut NunaOilimut naalakkiuteqarput. Uuliamik misissuinermik suliffeqarfiusup arfineq marlunnik sulisulimmi sipaarniartoqassasoq naalakkiutaannut ilaavoq, naalakkiut sulisut affaannanngortinneqarnissaannik sulisuuinnartussallu aningaasarsiaannik appaanermik imalik.
Uuliamik ingerlatsineq nalornissutigineqarpoq
Naalakkersuisut siulittaasup naalakkersuisoqarfiata naalakkiuteqareersoq, siulersuisuunerit tamarmik siulittaasortik Frank D. Petersen peqatigalugu ippassaq tunuarput.
Taanna ukiuni 40-ni kingullerni uuliasiornermik ingerlatsivinni nunarsuaq tamakkingajallugu sulereersimavoq.
- Nalornerujussualerpugut, NunaOil allaffeqarfissuarmi ilatsiinnartunngorlugu ingerlanneqalissasoq politikerit kissaatigineraat imaluunniit sulianut ilisimannittunik sulisulerluni ineriartornissamik periarfissalimmik uuliamik ingerlatsiviussanersoq. Taamaattumik ingerlatsivik qimapparput, KNR-mut taama oqarpoq.
Ingerlatsiviujunnaarluni piginneqatigiiffinngortoq
Frank Dinhoff Pedersen 2009-mi NunaOilimiilerpoq. Ukiut pingasut tassaneereersoq ukioq 2012-mi NunaOil pillugu nalunaarusiami siunnersuutigineqarpoq, ukiuni arlalinngortuni namminersorlutik oqartussat suliffeqarfiutaat ingerlatsiviujunnaarluni piginneqatigiiffinngortinneqassasoq.
Naalakkersuisut ukioq atortussiat aatsitassallu pillugit pilersaarusiaanni ersersinneqarpoq, ingerlatsiviup siunissami uuliasiornerni piginneqataassutissaat siornatigut 8-12 procentiusartut 6 procentinut appartinneqassasut. Tamannalu siulersuisuunernit akerlerineqarsimavoq.
Aliatsannarpoq Kalaallit Nunaata uuliasiornermik ingerlatsivik sulisunik tamakkiisumik atorfigeqartoq piumajunnaaraat, siulersuisuunerni siulittaasuusismasoq oqarpoq nangillunilu:
- Maannakkut siunissami misissuinissamik suliani sunniuteqaqataasinnaajunnaarpugut.
Aatsitassanut Naalakkersuisuugallartoq Finn Karlsen pisoq pillugu oqaaseqartinniarlugu iluatsinngilarput, Naalakkersuisunilu siulittaasuugallartoq Kim Kielsenip ingerlatsiviit allattoqarfianut innersuuppaatigut. Tassanilu susoqassanersoq utaqqimaarneqarpoq - Naalakkersuisuugallartut siulersuisuunerit nutaat ivertissaneraat imaluunniit qinersineq utaqqineqassanersoq.
- Maanna suliaq misissorparput. Pisup assinganik misigisaqanngisaannarnikuuvugut. Taamaattumik pisoq qanoq suliareriassanerlugu maanna paasiniarlutigu, Rasmus Pedersen Ingerlatseqatigiiffiit allattoqarfianni immikkoortortami pisortaq, KNR-mut taama oqarpoq.
Aatsitassanut Naalakkersuisoqarfimmi pisortaaneq Jørn Skov Nielsen maanna uuliasiorneq pillugu allaffeqarfimmi akisussaasuunerpaavoq. NunaOilip siulersuisuuneqannginnera pillugu oqaaseqarusunngilaq, siulersuisoqannginneq qaammatit arlallit pisinnaaratartoq.
- NunaoOil suliassatta ataanniinngilaq, suliffeqarfillu pillugu oqaaseqarfigisinnaanngilara, qinersinissaq qanilliartortillugu, Jørn Skov Nielsen KNR-mut oqarpoq.
Aamma atuaruk Nunaoil qaammaterpassuarni susinnaajunnaarsinnaasoq
