NunaOil: Piginneqatigiissutit appartinneqarnerat isumaqataaffiginngikkaluarparput

Uuliasiornermik Aatsitassarsiornermilu Namminersorlutik Oqartussat periusissiaanni, NunaOil-ip akuersissutinik piginneqataasarnera 6 procentiinnanngortinneqarpoq, ulloq manna tikillugu piginneqataassutit 8 procentip 12,5 procentillu akornanniittaraluartut, taamaalillugu millisillugit.
Allattoq Apollo Jeremiassen
februaarip 20-at 2014 13:59

Namminersorlutik Oqartussat piginneqataassutinik appaanerata pilersissavaa, uuliasiorniarnermi akuersissutinik aalajangiisarnermi, NunaOil-ip sunniuteqartarnerata annikinnerulernera, NunaOil-ip pisortaa, Hans Kristian Olsen oqarpoq imalu nangilluni.

- Periusissap tusarniarneqarnerani erseqqissarparput, NunaOil-ip akuersissutini tamani 12,5 procentimik piginneqataassutaata annikillisinneqarnissaa isumaqataaffiginagu, NunaOil-ip pisortaa, Hans Kristian Olsen oqarpoq.

Piginneqataassutit 6 procentiinnanngortinneqarnerisa saniatigut aamma NunaOil-ip uuliasiornermi sulianik ingerlatitsisutut ineriartortinneqarnissaa, siunissamut pilersaarutaagaluartoq, Namminersorlutik Oqartussat periusissiaanni allanngortinneqarpoq taamaativinneqartussannmgorlugu.

NunaOil Namminersorlutik Oqartussanit 2005-miilli aningaasaliiffigineqartarsimanngilaq, tamassumunnga pissutaavoq misissuinerni NunaOil sajuppillatsitsilluni suliaqartarnermini aningaasanik isaatitsisarsimammat. Taamaalilluni Namminersorlutik Oqartussanit aningaasaliinissaq pisariaarussimalluni.

- Ukiuni aggersuni aningaasat iluanaarutigisarsimasagut atortussaavagut. Taava ukiut marlussit qaangiuppata paasissavarput NunaOil-ip pisortanit aningaasaliiffigineqarnissaa pisariaqalersimanersoq, Hans Kristian Olsen oqarpoq.

NunaOil siorna 2013-mi ukiumoortumik naatsorsuutaanni 9 million koruunit angujangallugit amigartooruteqarpoq, naatsorsuutigineqarlunilu ukioq manna aamma taama amerlatigisunik amigartooruteqarumaarlutik.

- Tassami Nunatta uuliasiortitseqatigiiffiattut inissisimavugut. Kisianni ulloq manna tikillugu suli uuliamik nassaartoqanngilaq, taamaattumik NunaOil-i aningaasarsiornerani, NunaOil-ip pisortaa, Hans Kristian Olsen taama oqarpoq.

Taassuma erseqqissaassutigaa, NunaOil-imut pingaaruteqartuummat Nunatsinni kisiartaallutik uuliasiornermut akuersissutini tamani pissutsinik qanimut ilisimasaqartuullutillu paasisimasaqartuugamik, annertuumik akisussaaffeqarlutik. NunaOil-ilu kalaallitnut inuiaqatigiinnut iluaqutaasoq oqaatigalugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq