NunaOil aningaasarsiorumavoq

- Aamma taanna qulakkiissavaa, aamma qulakkiissavaa nunatsinni uuliasiornermik ilisimasaqalernissarput, aammalu siunissami allanik suleqarteqarluni uuliasiornermik ingerlatsilernissaq ilisimasaqarnerulernissaa aammalu nammineersinnaalernissaa siunertaalluni.

Taama oqarpoq Inuussutissarsiornermut aamma Aatsitassanut Naalakkersuisoq, Ove Karl Berthelsen.

Baffinip kangerliumarngani uuliaqarneranik misissuinissani uuliasioqatigiiffissuit arfineq marluk akuersissutinik tunineqartut saniatigut, nunatsinnit ingerlanneqartoq NunaOil A/S, akuersissutinut tunniunneqartunut ilaatinneqarluni akuersissummik pivoq.

NunaOilip misissuinissanut peqataasussaanera Aatsitassat pillugit inatsimmeereerpoq, taamaalilluni nunatta piattut pisussaaffilerneqarsimalluni pinngitsoorani misissuinernut peqataasussatut.

Akuersissutinut tunniunneqaqqammersunut tamanut 12,5 procentimik piginneqataasussatut aalajangiunneqarsimalluni.

Aatsitassanut Naalakkersuisup oqarnera malillugu, NunaOil tassaavoq nunatsinni uuliasiornerup aallartisarnerani ammalu qalluisoqalissappat aningaasanik nunatta qaloorisussaa.

NunaOil nammineq qanormita tamatumunnga isumaqarpaa, NunaOilip pisortaa, Hans Christian Olsen ima oqarpoq:

- Naalakersusiup oqarnera ilumoorpoq. Ima paasillugu, uangut nammineq maannakkut aningaasartuuteqarata peqataalerpugut, siunissamilu qalluisoqalissappat qallorneqartut naligisa 12,5 procentii uagutsinnut nakkartartussaagamik, taamaalilluni oqartoqarsinnaalluni tunisassiulernermiit nunarput aningaasarsiulersussaalluni.

Tassa maanna NunaOil-ip nunarsuarmi uuliasioqatigiiffissuit annersaasa ilaat suleqatigilersussaavaat, ilaatigut Shell aamma Statoil. NunaOilip pisortaa tamatumunnga ima oqarpoq:

- Soorunami neriuppunga uagutsinnut ajunngitsumik sunniuteqassasoq. Maannamut suleqatigut suleqatigilluartorujussuuagut. Tassami uagut ilisimasagut suleqatitsinnut aamma tunniussuuppagut, neriuutigiinnassavarpullu suleqatigiinnerput ingerlalluarumaartoq. Taama oqarpoq NunaOilip pisortaa, Hans Christian Olsen.