Nunanut allanut tunngasunut ministerip isornartorsiuineq ilumuunnginnerarpaa
KØBENHAVN: - Kalaallit Nunaat Naalagaaffeqatigiit nunanut allanut politikkiannut sunniuteqaqataalluarpoq.
Inuit Ataqatigiit siulittaasuata Sara Olsvigip AG-mi allaaserisamini Kalaallit Nunaata naalagaaffeqatigiit nunanut allanut politikkiannut naammaginartumik akuutinneqannginneranik danskit naalakkersuisuisunik isornartorsiuinerata kingorna, danskit nunanut allanut ministeriat, Martin Lidegaard (R), KNR-imut taama oqarpoq.
Martin Lidegaardip aamma ineriartortitsinermut niuernermullu ministerip Mogens Jensenip (S) aviisimi ullormut saqqummersartumi Politikenimi sapaatit-akunnialuit matuma siorna allaaserisaminni, Danmarkip nunanut allanut tunngatillugu politikkikkut soqutigisaanik taakkartuinerminni Issittoq pillugu eqqaasaqannginnerisa kingorna taama isornartorsiuisoqarpoq. Olsvigip danskit tungaannit Issittoq "nipaarsaarutigineqartutut" isiginerarpaa.
Issittumulli tunngatillugu Danmark Kalaallit Nunaallu nunanut allanut politikkikkut suliani qanittumik suleqatigiipput, Martin Lidegaard oqarpoq.
- Isumaqanngilanga suliassaqarfik pineqartoq sumiginnarneqartoq (...). Arfattassiissutit Kalaallit Nunaata ukiorpassuarni kissaatigisimasaanik qanittukkut pissarsisoqarnerani Danmarkip Kalaallit Nunaatalu akornanni pitsaalluinnartumik suleqatigiittoqarnera eqqaaginnarsinnaavara. Tamannalu illuatungeriit illugiillutik annertuumik suliniuteqarnerisigut aatsaat anguneqarsinnaasimavoq.
Tamanna Issittumi Siunnersuisooqatigiit pillugit oqallinnermut aamma atuuppoq, oqallinnerlu taanna Kalaallit Nunaata Danmarkillu marluullutik eqeersimaartumik peqataaffigaat.
Olsvig: Nunanut allanut politikkimut siammasinnerusumut Kalaallit Nunaat Savalimmiullu peqataatinneqarlik
Sara Olsvig naapertorlugu, Kalaallit Nunaata, Danmarkip Savalimmiullu akornanni oqaloqatigiinneq pitsaasuuvoq". Kisianni Issittoq ministerit allaaserisaanni eqqaaneqanngimmat "danskit naalakkersuisuisa DNA-vanni amigaateqartoqarpoq”, allaaserisamini taama allappoq. Martin Lidegaardip kinguninngua allaaserisaqaqqilluni Issittup "soorunami" ilaatinneqarneranik erseqqissaateqaraluartoq taama isumaqarpoq.
Olsvig isumaqarpoq Kalaallit Nunaat Savalimmiullu nunanut allanut politikkikkut tamanut eqeersimaarnerusumik peqataatinneqartariaqartut - aamma Issittumut tunngasuunngittunut tunngatillugu.
Tassungalu atatillugu, Martin Lidegaard ima oqarpoq.
- Nunanut allanut politikkimut tunngasut suulluunniit kalaallit savalimmiormiullu peqatigalugit eqqartornissaat ajoriffissaqartinngilara, isumaqarpungali soqutigisarisat katersuuffiini aammalu nunanut allanut politikkikkut kunngeqarfittut aalajangiiffigisassatsinni kalaallinut savalimmiormiunullu pingaaruteqarluinnartuni aatsaat taamaaliortoqartarnissaa tlluarnerussasoq.
Hammondip Lidegaard nersualaarpaa
Inuit Ataqatigiit siulittaasuata isornartorsiuinera Naalakkersuisut siulittaasuata Aleqa Hammondip aamma pissusissamisuunnginnerarpaa, isornartorsiunerlu "tunngavissaqannginnerarlugu".
- Kalaallit Nunaata Danmarkillu akornanni nunanut allanut politikkimut tunngatillugu aatsaat taama pitsaatigisumik suleqatigiittoqarpoq, isumaqarpungalu nunanut allanut politikkimik ilusilersuinermi Kalaallit Nunaannit, Savalimmiunit Danmarkimiillu annertuumik suliaqartoqartoq.
Aleqa Hammondilli aamma erseqqissaatigaa, Danmark suliani issittumi soqutigisanut attuumassuteqanngitsuni nammineerluni nunanut allanut politikkimik ingerlatsinissaminut "tamakkiisumik pisinnaatitaasoq".
