Nunanut allanut ilinniariat ikileriaqaat
Ikileriarneri pitsaanngitsutut, ilinniartunut aqqutissiuisoq Københavnimi Kalaallit lluutaaniittoq, isumaqarpoq. Kisianni aamma ilinnialerniartut ilinniagassaminnik piviusorsiornerullutik qinigaqartalersimanerannut tamanna ersiutaasutut isigaa.
- Piumasaqaatit annertoorujusuusut paasilluarpaa, Kalaallit illutaanni ilinniartunut aqqutissiuisoq Pia Rosing Heilmannip oqarpoq. Taassumalu ilimagaa, nunani allani ilinnialerniaraanni suut piumasaqaataasarnersut, ilinnialerniartut ilinniareersimasuni tusartarsimagaat.
Tassalu taanna naapertorlugu ilinnialerniartut piumasaqaatit annerunerannik paasinninnerullutik, namminneq piginnaasamik qanoq innerannik piviusorsiornerusarput.
Ilinniartut nuani allani ilinnialersimasut allanit ilungersornerusarput.
Ilinniartut ilikkagassaat arlaqareerput, soorlu nuami allamiinnissaq, kulturi allaanerusoq oqaatsillu allaanerusut. Taakkuali saniatigut aamma ilinniagassat qaffasinnerusumik imaqartut ilinniarnissaq sungiunniartussaagaat, Pia Rosing Heilmann oqaluttuarpoq:
- Oqaatitsigut piumasaqaataasut annertulaartut, imaassinnaavoq inuusuttut paasisimagaat. Aamma nunani allani ilinniassagaanni ingammik tuluttoornermut piareersimanissaq pingaartorujussuuvoq, ilinniartunut aqqutissiuisoq oqarpoq.
Tassami nunani allani piumasaqaatit qaffasittaqimmata, nunatsinneersut nunani allani ilinnialerniaraangata, pikkorinneroqqullugilluunniit inattarpaat. Assersuutigalugulu tuluttut GU-mi niveau c ilinniarfissaanni piumasaqaataasimappat, niveau b naammassisimassagaat, ilinnialerfissaannilu niveau b puiumasaqaataappat, niveau a naammassisimassagaat, ilinniartunut aqqutissiuisut inattarpaat.
Tassalu Pia Rosing Heilmann naapertorlugu, ilinnialerniartut ilinniarfissaminnik qinigaqaraangamik piviusorsiornerulersimaneri pitsaasuuvoq.
Aammali amerlanerusut nunani allani ilinnialernissamut piginnaasaqarluarnissaat kissatiginartikkaluarpaa:
- Uanga isumaqarpunga amerlanerulaartut nunani allani ilinniartariaqartut. Tamannami pingaarpoq, ilinniagartillu nunatsinnut uterunik atorluarsinnaavat, Pia Rosing Heilmann oqarpoq.
Kisianni taamaliussagunik, GU-mi atualernerminniilli piareersalernissaat pisariaqarpoq, tassanilu fagit saniatigut toqqagassat ilinnialigassamut naleqqutunngortillugit, Københanvimi Kalaallit illutaanni ilinniartunut aqqutissiuisoq Pia rosing Heilmann erseqqissaavoq.
