Flyktninghjelpen: Nunani tamalaani ikiorsiinissamut aningaasaliisoqarnissaa amigaatigineqarput

Nunat assigiinngitsut nunanut ikiorsertariaqakkanut aningaasaliisarnerat ukioq manna naammanngillat, pissutsillu ajornerulersinnaasut, qimaasut pillugit Norgemi qullersaqarfiup Flyktninghjelpenip ullumi mianersoqqussutigaa.
Nunat Naalagaaffiit Peqatigiit naapertorlugit nunarsuarmi inunnik ikiuiniarnissamut aningaasaliisartut 27 procentiinnai ukiup qiteqqunnerani aningaasaliisimapput. Toqqorsivimmit assi Assi © : Filipe Moreira/Flickr Creative Commons
Allattoq Ritzau
juulip 15-at 2019 10:34
Nutserisoq Mads Lynge

Ikiorsiinissamut aningaasaliissutissat 27 procentiinnaat, nunat assigiinngitsut ukiup massuma ingerlanerani aningaasaliissutigisimavaat.

Aningaasat 26 milliardit dollarit, imaluunniit 172 milliardit koruunit missaat, inunnut ikiorsertariaqakkanut 94 millioninut pisariaqartinneqartut oqaatigineqarpoq, nunalli assigiinngitsut ikiorsiinissamut aningaasaliissutiginiakkami taamaallaat 27 procentii maannamut aningaasaliissutigisimavaat.

Nunat assigiinngitsut 7 milliardit dollarinik, imaluunniit 46,5 milliardit koruunit missaannik, ikiorsiissutissanutt maannamut aningaasaliisimapput. Siornamut naleqqiullugu 2 milliardit dollarinik ikinnerupput. Aningaasaliissutigineqartullu taamaasillutik 19 milliardit dollarinik, imaluunniit 125 milliardit koruuninik amigaateqarput

- Ikiorsiinissamik suliaqarnissamut aningaasanik pisariaqartitsineq aarlerinarpoq. Naak pisariaqartitsineq anneruleraluartoq ikiorsiisoqarnissaanut aningaasassat ukiup siusianut sanilliullugit annikinnerungaatsiarput. Pisoq pillugu aarleringaatsiarpugut, qimaasut pillugit qullersaqarfiup qullersaa, Jan Egeland oqarpoq.

- Tulleriiaarinerit apeqqutaapput. Nunarsuarmi nunat assigiinngitsut illersornissaqarfimmut aningaasaliissutaat katillugit 1800 milliardit koruuninik amerlisimapput, Jan Egeland oqarpoq.

Camerounimut DR Congomullu aningaasaliissutissat amigaateqartut, soorlu aamma Syriamut aningaasaliissutissat amigartutut nalilerneqartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq