Nunani issittuni politiit siuttui Iqalunni naapipput

- Nunani assigiinngitsuni pingasuni sulivugut, taamaattorli inuiaqatigiinni toqqissisimanissaq isumannaallisaanerlu sulinitsinni siunertaraarput, isumasioqatigiinnermi qaaqqusisuusoq, Nunavummi politimesteri, McVarnoch oqarpoq. Taassuma oqalugiarnermini issittumi avinngarusimasuni inuiaqatigiinni ikittunik innuttaqartuni ajornartorsiutaasartut sammineruvai.

- Issittumi najugaqartut pinerluuteqartarnerat akiorniarneqassappat issittumi najugaqartut kulturiat politiinit eqqartuussivinniillu paasilluarneqarnissaa pingaaruteqartorujussuuvoq, McVarnoch oqarpoq.
Issittumi politiit isumasioqatigiinneranni politimester Bjørn Bay nunatsinnit peqataavoq.

Taassuma issittumi nunat pingasut isumasioqatigiinnerat naammassimmat, nunani taakkunani ajornartorsiutaasartut assigiinnerat maliginniarpaa.

- Nunani taakkunani pingasuni inuttut atugassarititaasut pinerluttuliortarnerillu annertussusii assigiinngikkaluartut ajornartorsiutigineqartartut  assigiiaarput, Bjørn Bay oqarpoq.

Isumasioqatigiinneq peqataasunit isumassarsilluarnartutut nalilerneqarpoq, ukiunilu tulliuttuni nanginneqarnissaa isumaqatigiissutigineqarluni.