Nunani avannarlerni avatangiisinut ministerit: Issittumi uuliasiorneq inerteqqutigineqarli

- Imaata sikuata aakkiartornerata peqatigisaanik uuliasioqatigiiffiit silap pissusaanut akornutaanerusinnaasumik uuliasiornissaminnut piareersimapput. Issittumi avatangiisit uumasullu uuliakoortoqassagaluarpat annertuupilussuarmik eqqugaasussaapput, avannarpasinnerusumilu pissutsit sakkortunerummata ajutoortoqaratarsinnaanera qaninneruvoq saliinissamullu periarfissat killeqarnerullutik. Taamaammat nunat issittumiittut imaani uuliasiornissamik inerteqquteqarnissaannut kaammattorpagut,  Finlandimi avatangiisinut ministeri Ville Niinistö, Norgemi avatangiisinut ministeriusimasoq Erik Solheim aamma Sverigemi avatangiisinut ministeriusimasoq Mona Sahlin taama allaaserisaqarput.

Sikuiuitsup kujalliup eqqissisimatitaanissaanik 1991-imi isumaqatigiissutaasoq tikkuarpaat.

- Nunarsuarmioqatigiit Sikuiuitsup kujalliup illersorneqarnissaanik 1991-imi isumaqatigiissinnaappata, aamma tamanna issittumut tunngatillugu iluatsinneqarsinnaasariaqarpoq. Nunat issittumiittuusugut annertuupilussuarmik akisussaaffeqarpugut, taama allapput.

Finland naalagaaffinni issittumiittuni siullersaalluni Qalasersuup eqqaata uumasunik eqqissisimatitsivissanngortinneqarnissaanik kissaateqarsimavoq.

Peqatigitillugu ilaatigut Issittumi aalisakkanik pisuussutit nalituupilussuit illersorniarlugit Issittup imartaani uuliakoortoqannginnissaa anguniarlugu nunat issittumiittut inatsisitigut pituttuisumik isumaqatigiissuteqarnissaat ministeriusimasut pingasuusut kaammattuutigaat.

Ville Niinistöp, Erik Solheimip aamma Mona Sahlinip Issittumi uuliasiornermik nalorninartumik akiuinissamik Greenpeacep isumaqatigiissusiaa Arctic Declaration atsioqataaffigisimavaat.