Nunani avannarlerni attaveqaqatigiit Ilulissani naapeqatigiittut
Pisortat namminersortullu suliffeqarfii peqatigiillutik inuiaqatigiinnik piujuaannartitsinissaq tunngavigalugu qanoq ineriartortitsisinnaanersut oqaluuserissavaat.
Suliffeqarfiit suliniaqatigiiffiillu peqataatitaqartussat Naalagaaffiit Peqatigiit suliniutaannut Global Compactimut, suliffeqarfiit inuiaqatigiinnut akisussaaffeqarnerinik piujuaannartitsinissarlu tunngavigalugu ineriartortitsinermik nunarsuaq tamakkerlugu suliniutaasumut peqataasuupput.
Ilulissani naapeqatigiinneq suliniummi attaveqaqatigiinnik nunani avannarlerneersunik naapeqatigiissitsineruvoq, tamannalu ukiup affakkuutaartumik pisarpoq siullerpaamillu Nunatsinni ingerlanneqarluni.
Saqqummiisussat ilagaat Maliina Abelsen, taassumalu Arctic Winter Gamesip ingerlanneqarnerani misilittakkat aamma suliffeqarfinnik, pisortanik, kommunimik timersoqatigiiffiillu kattuffiinik suleqateqarneq oqaluttuarissavai.
Nunanit allanit oqalugiartussat ilagaat Gunnar Bengtsson biililiorfissuarmit Volvomeersoq, taassumalu pinngortitaq pillugu nunarsuaq tamakkerlugu suliniaqatigiiffimmik WWF-imik suleqateqarnertik oqaluttuarissavaa.
Attaveqaqatigiinnik naapeqatigiissitsinermut ullumi marlunngornermi aqagulu pingasunngornermi ingerlanneqartumi inuit katillugit 70-it peqataapput. CSR Greenland aaqqissuisuuvoq Hotel Arcticimilu ingerlanneqarluni.
