NunaMineralsip siunissaa suli nalunarpoq

NunaMineralsip akiliisinnaajunnaarluni nalunaaruteqarnera eqqartuussivitsigut suliarineqarnera tallimanngorpamut kinguartinneqarpoq. Patrick Newmanili NunaMinerals pillugu ullumi apersorneqartussaagaluarnera taamaatinneqarpoq.

Allattoq Malu Pedersen, Sandra Meinecke

maajip 13-at 2015 12:53

Radioavisimit ippassaq oqaatigeriikkatsituut NunaMineralsip akiliisinnaajunnaarluni nalunaaruteqarnera ippassaq eqqartuussivitsigut suliarineqartussaagaluarpoq. Minutsillu 20-unngitsut qaangiummata matut ammarneqarput, aalajangiinissarlu kinguartinneqartoq nalunaarutigineqarluni.

Ole Christiansen Patrick Newmanilu oqaaseqartinniaraluaratsigit tamarmik oqaaseqarusunngillat.

Aamma atuaruk Eqqartuussivimmi kinguartitsineq NunaMineralsimut neriuuteqalersitsivoq

Kinguartitsineq Patrick Newmanip suliffeqarfimmik annaasserusunneranut pissutaanersoq Ole Christiansenip Patrick Newmanillu annerusumik oqaaseqarfigerusunngilaat.

Patrick Newman ippassaq neriorsuivoq Radioavisimit ullumi apersorneqarsinnaassalluni, NunaMineralsip annaanniarneqarneranut suliniutit killiffii tassani oqaaseqarfigisinnaanerarlugit.

Apersorneqarnissaali taamaatinneqarpoq. Patrick Newmanimi inatsisitigut siunnersortiminit siunnersortissimavoq aatsaat tallimanngorpat oqaaseqarsinnaassalluni, taama taanna KNR-imut allappoq.