Eqqartuussivimmi kinguartitsineq NunaMineralsimut neriuuteqalersitsivoq
NunaMineralsip siunissaa ullumi aalajangiiffigineqartussaagaluarpoq, tassami akiliisinnaajunnaartutut nalunaarnera Nunatta Eqqartuussiviani aalajangiivigineqartussaagaluarpoq.
Aalajangiiniarnerli allarluinnarmut sangutinneqarpoq.
Aatsitassarsiornermut misissueqqissaartarfiup NunaMineralsip apriilimi akiliisinnaajunnaartutut nalunaarumalluni qinnuteqarnera Nunatta Eqqartuussiviani ullumi suliarineqartussaagaluarpoq.
Eqqartuussivimmi aalajangiinissaq nalunaaqutaq ataatsimut pisussatut ullumi pilersaarutigineqaraluarpoq, NunaMineralsilli pisortaa Ole Christiansen eqqartuussivimmut siullersaalluni nalunaaqutaq ataasinngulersoq iserpoq.
Aamma atuaruk NunaMineralsip siunissaa ullumi aalajangiiffigineqassaaq
Eqqartuussineq ataatsip qaangilaaraa aallartippoq, minutsillu 20-iunngitsut qaangiummata naammassineqarluni.
Ole Christiansen eqqartuussivimmiit anisoq KNR-imit naammattoorparput.
Suliffeqarfik annaanneqarsinnaanersoq suli nalunartoq
- Sunaana eqqartorissi?
- Eqqartuinngilagut, taamaallaat oqarsinnaavunga naapinnissarput tallimanngorpamut kinguartinneqarpoq.
- Kinguartitsinermut suna pissutaava?
- Oqaatigisinnaanngilara.
Ole Christiansen oqaaseqarusuppianngitsoq taama oqarpoq, suliffeqarfillu akiliisinnaajunnaarnersoq aperineqarami akiumanngilaq.
Aamma atuaruk NunaMineralsip annaanniarnera suli ilungersuutigineqarpoq
Patrick Newmanip suliffeqarfimmik annaasserusunnera pissutaanersoq Ole Christiansenip Patrick Newmanillu annerusumik oqaaseqarfigerusunngilaat.
Patrick Newmanili neriorsuivoq Radioavisimit aqagu apersorneqarsinnaassalluni, NunaMineralsip annaanniarneqarneranut suliniutit killiffii tassani oqaaseqarfigisinnaanerarlugit.