NunaMineralsip annaanniarnera suli ilungersuutigineqarpoq
Allakkani ukioq manna apriilip 21-anni ullulerneqarsimasuni, tusarfimmit NunaMineralsimut qanittumik inissisimasumit KNR-ip pissarsiarisaanni, NunaMineralsimut aningaasaliisut ilaat - Koreami suliffeqarfimmit naalagaaffimmit pigineqartumit Kores-imit allakkani oqaatigineqarpoq, taasisinnaanertik Greenland Rare Earth Projectip pisortaanut Patrick Newmannimut tunniukkusukkitsik, taanna taamaalilluni namminneq sinnerlutik taasisinnaaniassammat.
Allakkat akiliisinnaajunnaartup pigisaanik nalilersuititaasumut, NunaMineralsip siulersuisuini siulittaasumut Birks Bovairdimut aamma Patrick Newmanimut nassiunneqarput.
Patrick Newmanip suliffeqarfiutaa aamma Koreamiut suliffeqarfiutaat 2014-iinnarmi ataatsimoorlutik 1,2 millionit dollarsinik (qallunaat aningaasanngorlugit 8,2 millionit koruuninik) NunaMineralsip Nunatsinni misissueqqissaarnerinut aningaasaliissuteqarput.
Taamaattumik aningaasatigut aaqqiisoqarsinnaanissaa aningaasaliisut taakku marluusut suli neriuutigaat, suliffeqarfik taamaalilluni ingerlaannarsinnaaniassammat, aningaasaliisullu aningaasaatiminnik utertitsisinnaaniassammata, tamatumani Namminersorlutik Oqartussat ilanngullugit.
Allakkat Koresimeersut naalisarneqanngitsut nittartakkatsinni knr.gl-imi atuarneqarsinnaapput.
