NunaMinerals oqaluuserineqaraangat, Ole Christiansen aamma eqqaaneqartarpoq
Suliani pillugit taanna maanna nersorniarneqalerpoq, nunat avannarliit nersornaasiuttagaannik, Den Nordiske Efterforskningspris 2013-inik tunineqartussanngorami.
NunaMineralsip kujataani Niaqornaarsuup eqqaani Vagarimi kuultisiorfiani misissuinernut atatillugu paasissutissat isumalluarnartut pillugit ilaatigut nersorniarneqarpoq, aatsitassarsiorsinnaanissarlu pillugu Nunatsinni ukiorpassuanngortuni sulisimanini nersorneqaatigalugu.
Nunatsinni aatsitassarsiornermut atatillugu ukiut tamaasa unammisitsisarneq "Ujarassiorit" amerlasuut ilisimagunarpaat. Unammisitsineq taanna Ole Christiansenimit isumassarsiarineqarpoq, Nalunamilu kuultimik nassaartoqarneranut ilaalluni, Maniitsullu ungasinngigisaani Seqinnersuusami olivinisiortoqarsinnaanissaa peqataaffigisimagaa.
NunaMineralsip siuliersuisuisa siulittaasuata Birks Bovairdip Ole Christiansen pilluaqquaa Den Nordiske Efterforskningspris 2013-imik tunineqarneranut, Ole Christiansenip taama nersorniarneqarnera tulluartuunerarlugu.