NunaMinerals: Aktianut sunniuteqanngilaq

- Carsten Berger tassunga ingerlaartoq, tamatta nalunikuunngilarput, NunaMinerals A/S-ip pisortaa Ole Christiansen taama oqarpoq.

Carsten Berger aktianik pigisaqarluartuuvoq, NunaMineralsimi aktiat 19,5 procentii pigalugit. Apriilimi akiliisinnaajunnaartutut nalunaarutigineqarpoq; inuttut aammalu suliffeqarfiutimini aningaasalersuisartumi Rudersdal A/S-imi. Akiliisinnaajunnaarnermi nakkutiginnittut aningaasanillu attartortitsisimasut aktiaaterpassuarnik maanna tuniniaasussanngorput.

NunaMineralsip aktiat maaji naalersoq amerlivai. Ole Christiansen oqarpoq, aktiaatillip akiliisinnaajunnaarnera aktiat nalinginut sunniuteqanngitsoq:

- Aktianik tuniniaanerput annertuumik soqutigineqarpoq, aktiat nioqqutigisavut soqutigineqarluarlutik.

NunaMineralsip aktiaasa nalingi qaffasinnerpaagamik 2007-imi 475 kooruuneqarput. Ullumi 234 koruuneqassasut ilisimagineqarput, tassalu nalingisa affai:

- Assigiinngitsorpassuarnik pissuteqartumik aktiat nalingi qaffattarput appartarlutillu, taamaattumik nalileruminaappoq, aktiat nalinginut una pisoq ataaseq sunniuteqarsimanersoq, Ole Christiansen oqarpoq.

NunaMineralsimi aktiat 19,5 procentii Carsten Bergerip pigisarai. Namminersorlutik Oqartussat piginnittuni annerpaapput, 37,1 procentinik pigisaqarlutik, Lønmodtagernes Dyrtidsfond aktiat 17,9 procentinik pigisaqartoq.