Nunalerineq pillugu isumalioqatigiissitaq pilersinniarpaat
Savaatillit Peqatigiit Suleqatigiissut, Nunalerineq Pillugu Siunnersuisoqatigiit, Neqi A/S, kommunit susassaqartut suliffeqarfiillu nunalerinermut tunngasunut attuumassuteqartut, soorlu aningaaseriviit, pisiniarfiit assigisaalu, Naalakkersuisut qaaqquniarpaat.
- Nunatsinni nunalerinerup aamma savaateqarnerup Nunatta iluani nerisaqarniarnitsinnut qanoq ililluni siunissami tapertaasinnaanerata misissuiffiginissaa, isumalioqatigiissitap pingaarnertut suliarissavaa. Isumalioqatigiissitap taamaalilluni nunalerinerup aamma uumasuuteqarnerup siunissami nammineq akilersinnaanerusumik ingerlalernissaanut tunisassiaqarnerulernissaanullu aaqqissuusseqqinnissaq siunnersuusiorfigissagaa, Naalakkersuisut allapput.
Tamatuma saniatigut nunalerinermi nersutaateqarnermilu kinguaariit siunissami nikinnissaannut iliuusissanik innersuussinissaq, isumalioqatigiissitap aamma suliassarissavaa.
