Nunafondip ingerlannera akisuvoq

Nunafondi, aningaasaateqarfiusoq Nunatsinni tamanut iluaqutaasinnaasunut ajunngitsuliuutaasinnaasunullu tapiissuteqarsinnaasoq, pisortami siulersuisunilu ilaasortami akissarsiaannut aningaasartuutai tapiissutinullu atortagai ullumi amerlaqatigiingajapput.

Nunafondimi suliaqartunut nerisat akisuut. Akisunermi timmisartornerit. Akisunermi unnuinerit.  Aningasartuutillu allat. Aningaasartuutit ukiunik kingullerni aqukkuminaallisoorsimarpasipput.

Ingerlatsinermut ukioq kingulleq 2,7 milliuuni koruunit atorneqarput, aningaasaateqarfimmut qinnuteqarsimasunut aningaasat tunniunneqartut 3,2 milliuuni koruuniusimasut.

Aningaasat atorneqartut perruualaarutissaqqippallaanngikkaluarput, taamaattorli ukiut marluk matuma siornatigornit aningaasat qinnuteqartunut tunniunneqartunit amerlanerupput.

Taamani fondimi ingerlatsinermi aningaasartuutit, aningaasat tunniunneqartunit amerlanerupput.

Nunafondi Grønlandsbankenimi piginneqataassuteqarput, piginneqataassutillu namminersorlutik oqartussaniit aallaqqaammut aningaasaliissutapput. Taamaammat Nunafondimi aningaasaatitik qanoq atortarneraat inuiaqatigiinnut soqutiginaateqarpoq.

Aningaasartuutini annersat ilaat tassaavoq aningaaseteqarfiup allaffeqarfia.

Nunafondi allaffimmik Nuummi ammaanikuuvoq,  ulloq tamaat sulisumik aqutsisoqalernikuulluni. Aqutsisorlu assersuutigalugu biileqartariaqarluni sulinngifefqarnerminilu akiliunneqarluni angalasinnaatitaalluni. Taakkununnga aningaasartuutit katillugit 1,2 milliuuninik koruuneqarput.

Siulersuisut, politikeriunerusut, aamma akisupput.

Tassa siulersuisuni ilaasortanut katillugit 687 000 koruuninik fondi ukioq kingulleq akiliivoq. Taakkunannga 300.000 koruunit akissarsianut atorneqarput.

Siulersuisuni ilaasortat angalanerannut, akunnittarfinni unnuisarnerannut neriniartarfinnilu nerisarnerannut  300.000 koruuninik fondi aamma aningaasartuuteqarluni.

Nunafondip missingersuutai kingumut qimerlooraanni aningaasaetuutit qaffarujussuarsimasut takuneqarsinnaapput. Nunafondimmi 2005-imi aningaasartuutai 630.000 koruuniupput, 2009-mi 1,5 milliuuni koruuniulersimallutik 2013-milu 2,7 milliuuni koruuninngorsimaullutik.

Taamaakkaluartoq aningaasat tunniunneqartartut amerleriarsimanngillat. Allaalli ikerliarsimallutik.

Nunafondimi siulittaasoq Per Berthelsen, Siumut, radioaviisip oqaloqatigaa, taannali oqaaseqarusunngilaq, siulittaasuunikuusunulli innersuussilluni.