Nunafondenip tapiissutit amerlivai
Aningaasaateqarfiup NunaFondenip aningaasaliisarnini ukiunut allanut naleqqiullugu siorna 2013-imi marloriaatinngortippai, tamatumalu saniatigut aningaasartuutini ikilisissimallugit.
Aningaasaateqarfiup naatsorsuutini saqqummiuteqammerpai. Aningaasat siorna tunniunneqartut 7 millionit koruunit sinneqarput, 2012-imi 3,2 millionit koruuniullutik.
Aningaasat ingerlatsinermut atorneqartut aamma ikileriaateqarput, tassa 2,4 millionit koruunit siorna 2013-imi atorneqaramik, 2012-imi katillugit 2,7 millionit koruuniusimallutik.
NunaFondeninimi siulersuisut angalasarnerannut aningaasartuutit ikileriaateqarnerat pissutaanerpaavoq, allattoqarfimmillu attartornermut aningaasartuutit nuunnikkut aamma ikileriaateqarlutik.
Aningaasaliiffigineqartulli aningaasat sumut atorniarneraat pinerit tamaasa nalunaarsorneqartarsimanngilaq, aningaasaliiffigineqarsimasut pingasuugaangata taamaallaat ataaseq nalunaarusiorsimasarami.
- Ajoraluartumik taamaallaat akuersissummik pisimasut 30,08 procentinnaat nalunaarusiorsimapput - tamanna akueriuminaappoq, NunaFonden, nittartakkamini ilaatigut taama allaaserisaqarpoq.
Tamanna aaqqiiffigisariaqarpoq, minnerunngitsumik qinnuteqaateqarsimasut pinerullugit, tassami siusinnerusukkut tapiiffigineqarsimasut nalunaarusiorsimanngitsut qinnuteqaqqikkaluarunik akuersissummik tuninissaat assut ajornakusuussammat, immaqalu ilumoornerulluni oqaraanni ajornarluni.
