Nuna tamakkerlugu oqarasuaatikkut politiinut saaffiginnittarfik atoqqaartinneqartoq
Atoqqaarfissiortitsinermi sinerissami politeeqarfiit videokkut isiginnaarutit atorlugit peqataatinneqarput, rigspolitichef Jens Henrik Højbjerg politimester Bjørn Tegner Bay peqatigalugu oqarasuaatikkut politiinut saaffiginnittarfik atoqqaarfissiormassuk.
Danskit inatsisinut atuutitsinermut ministeriat Søren Pind atoqqaarfissiortitsinermi peqataasussaagaluarpoq, napparsimasoqarnerali pissutigalugu Kalaallit Nunaannut tikeraarnissani taamaatittariaqarsimallugu.
Oqarasuaatikkut politiinut saaffiginnittarfiup nutaap atulerneratigut Kalaallit Nunaanni innuttaasuut sumiikkaluartulluunniit assigiimmik politiinit kiffartuunneqarnisaat siunertaavoq.
- Politiinut saaffiginnittarfiup nutaap atulerneratigut innuttaasut politiinut attaveqarsinnaajuannassapput politiinillu oqaloqateqarlutik, kalaallisut qallunaatut tuluttullu oqaatsit atorlugit, rigspolitichef Jens Henrik Højbjerg taama oqarpoq.
Nakkutilliisoqarfik imaluunniit politiini pigaartunut saaffiginittarfik illoqarfinni mikinerusuni ataatsimik marlunnilluunniit politeeqartuni iluaqutaassaaq.
- Illoqarfimmi politeeq saaffigineqartoq imaassinnaavoq pingaaruteqartumik allammik ulapputeqartoq telefonilu tigusinnaanagu, taamaattumik politiinut saaffiginnittarfik maannakkut atulersinneqarpoq, Bjørn Tegner Bay oqarpoq.
Nuna tamakkerlugu oqarasuaatikkut politiinut saaffiginnittarfik normoqarpoq 70 14 48 taannalu ulluinnarni Nuummi saaffiginnissutinik suliaqartassaaq. Ualikkut sisamaniit aqaguani ullaakkut arfineq pingasut tungaanut taamatullu sapaatit akunnerisa naanerini nuna tamakkerlugu saaffiginnissutigineqartut suliarineqartassapput, tassalu apeqqutaanani Tasiilamit Upernavimmit Narsarsuarmiillu sianernersutit.