Nuna Mineralip aktiaataat akitsoriarput

Kujataani Niaqornaarsuup eqqaani kuulteqarfeqarneranik qaammatini kingullerni misissuinerit paasinarsisippaat, tamaani kuultisiorfissatut akuerisaasimasumi, katillugit 435 kvadratkilometerisut annertussusilimmi, 96 kvadratkilometerimi kuulteqarfeqartoq.

Niaqornaarsuup eqqaani kuulteqarfik kuultisiorfimmit Nalunamit kilometerinik 25-nnarnik ungasissusilimmiippoq, kuulteqarfinnillu suli amerlanernik tamaani peqartoq tassa paasinarsivoq.

Inernerit nutaat NunaMineralsimi pisortap, Ole Christiansenip, nuannaarutigai:

- Kujataani Niaqornaarsuup eqqaani ukioq-manna misissuinerit inerneri suliffeqarfiup oqaluttuarisaanerani pitsaanersaapput. Kuulteqarfimmik aatsaat taama annertutigisumk Kalaallit Nunaanni siumuivugut. Niaqornaarsuup eqqaata taama annertutigisumik kuulteqarfeqarnera pissutigalugu NunaMineralsip kuultisiorfinni sallersaanini suli uppernarseqqippaa, Ole Christiansen oqarpoq.

Taama pitsaasumik paasisaqarneq, NunaMineralsip pappialatigut piginneqatigiissutaani ullumi ingerlaannartumik takuneqarsinnaavoq, piginneqatigiissutimmi nalingisa qaffariaataat 50 procentip missaanik pataajaatsumik inissipput.