Nummioq soqutigineqarluarpoq
Nuummi inuit sisamararterutingajaat, novembarip aallaqqaataaniit manna tikillugu, Katuami filmertarfimmut filmeriarsimapput, filmi Nuummioq takusarlugu.
Allattoq Elisa Isaksen
novembarip 19-at 2009 07:12
Nuummiut 4.000-it filmi maanna takoreersimalerpaat, Nuummilu filmip takunissaanut sapaatiuppat periarfissaq kingulliussaaq.
- Filmeriat amerlassusaat naammagisimaarpavut, naak filmini Katuami takutinneqartuni nuannarineqarnerpaamit - Titanicimit - 7.000-init takuniarneqartumit, ikinnerungaatsiartunik takuniarneqaraluartoq, Katuami filmertarfiup pisortaa, Ove Heilmann, oqarpoq.
Filmi Nuummi takutinneqareernermi kingorna sinerissami aamma takutinneqassaaq.
Filmi Nuummioq Ilulissani Sermermiuni arfininngornermi novembarip 28-anni takuteqqaarneqassaaq.
Sapaatip akunnera ataaseq qaangiuppat, arfininngornermi decembarip tallimaanni, Sisimiuni kulturikkut illorsuarmi Taseralimmi takuteqqaarneqarumaarluni.
