Nuliata aalajangigaraa

Jens B. Frederiksenip sakkortuumik ilaatigullu tunngavissaqanngitsumik saassutarineqarsimanini tusagassiortunut sukumiisumik oqaluttuarai. Jens B. Frederiksenillu nuliata, Nunatsinni inuppassuit allat assingalugit, taamatut saassutarineqarnera aamma atuarsinnaasimavaa qisuariarfigisariaqarsimallugillu.

- Nuliama uanga True North Gemsimilu atorfininnera pillugu allaaserineqarsimasut atuareerlugit  sisamanngormat unnukkut sianerfigaanga. Naatsumik paatsuugassaanngitsumillu oqarfigaanga "Jensi, tassa naammaleqaaq", kaammattuutaalu malinniarlugu aalajangerpunga. Marsip qiteqqunnerani immikkut ittumik ataatsimeersuartoqareerpat politikki qimassavara, Michael Rosingillu Inatsisartunut ilaasortaaffinnut kingoraassavaanga, Jens B. Frederiksen oqarpoq.

Jens B. Frederiksenip siusinaarluni politikkimit tunuarnerarpoq. Qinigaaffik manna qaangiuppat aatsaat tunuarniarluni pilersaarutigisimagaluarpaa, inuttulli annertuumik saassutarineqarsimanini pissutigalugu aammalu politikererpassuit tatiginassutsiminik qularnartitsilersimanerat pissutigalugu siusinaarluni tunuarpoq. Jens B. Frederiksen marsip 15-iata kingorna Nunatsinni politikkimi oqaluttuaannanngussaaq.

-Pisuutitsinerpassuit tusarnaassallugit ilungersunartissimaqaara. Inatsisartut oqaluttarfiannit aatsitassat pillugit oqaaseqaqqinniarnanga oqareeraluarpunga, taamaammat pisuutitsinerit akueriumanngilakka. Tamannami aamma Demokraatinut aserorsaataassaaq, partiimullu ajorluinnartumik sunniuteqarluni. Kisianni uanga isumaqartuassaanga kikkulluunniit sunik inuussutissarsiuteqaraluarunilluunniit politikkimik suliaqarsinnaasariaqartut, Jens B. Frederiksen oqarpoq.