Nukissiorfimmiit Siumumut
Nukissiorfinni pisortatut tunuaqqammersoq Svend Hardenberg, partiimi Siumumi siunnersortitut atorfinippoq. Taassuma folketingimut qinersinissami tulliuttumi partii sullisissavaa.
Allattoq Elisa Isaksen
apriilip 13-at 2011 05:26
Atuagagdliutini ullumi saqqummersuni tamanna allaaserineqarpoq.
Svend Hardenbergip Nukissiorfinni pisortatut atorfini qaammatip ataatsip matuma siornagut tupaallaataasumik atorfigiunnaarpaa, taamaattorli Naalakkersuisut Alcoamut tunngatillugu isumaqatigiinniartartuini siulittaasutut ingerlaqqilluni.
Taanna isumaqarpoq Siumumi atorfittaani suliaminut tassunga akornutaanavianngitsoq.
- Folketingimut qinersinissaq alumiiniumik aatsitsiviliornissamut attuumassuteqanngilaq. Taamaattumik folketingimut qinersinissamut atatillugu Siumumik sullissinissara soqutigisanik aporaaffiunngilaq, Svend Hardenberg Atuagagdliutinut oqarpoq.