Nukissiorfiit A/S-nngortinnissaat akisunerulersitsissanngilaq
Nukissiorfiit aktianik piginneqatigiiffimmut allanngortinneqarnissaannut periarfissat unammilligassallu pillugit naatsumik nalunaarusiortoqarnissaa Naalakkersuisut pilersaarutigaat. Tamatumunnga atatillugu allanngortitsisoqassappat, tamatuma ammasumik, ersarissumik suleqataatitsiviusumillu, aammalu isummat soqutigisallu pingaarutillit tamarmik tusarneqarnissaannut qulakkeeriffiusumik ingerlanneqarnissaa Naalakkersuisunut pingaaruteqarpoq.
Piffissami aggersumi Nukissiorfiit ukiuni qulini kingullerni erngup nukinganut amerlasuunik aningaasaliisarsimanermi, nutaanut aningaasaliisarsimanermi aningaasaleeqqittarnermilu kingunerisaanik aningaasaqarnerminnik patajaallisaasussaallutik annertuunik unammilligassaqarput. Tamatuma saniatigut taperseeqatigiissitsisarnerit aammalu Nunap Karsianiit ingerlatsinermut tapiissutit ikilisikkiartuaartinneqarnissaat unammillerfiusussaapput.
Pissutsit tamakku pissutaallutik akeqartitseriaaseq atuuttoq misissoqqinneqartariaqarpoq, tamatumalu kingunerisaat akit tamarmiusut qaffanneqassapput. Tamatumani Nukissiorfiit suliffeqarfittut imminut ingerlattutut ingerlaannarnissaa imaluunniit aktianik piginneqatigiiffinngortinneqarnissaa apeqqutaassanngilaq.